Հայաստանի կառավարությունը հինգշաբթի կայացած նիստին հաստատեց 8,8մլրդ դրամի (շուրջ 17,74մլն․դոլար) Արցախի աջակցության հերթական ծրագիրը։
Ֆինանսների նախարարի պաշտոնակատար Ատոմ Ջանջուղազյանը նշեց, որ պատերազմից առաջ Արցախը գտնվում էր ուշադրության կենտրոնում և պայմանավորվածություն կար միջպետական վարկի տրամադրման մասին, իսկ պատերազմից հետո օգնության կարիքը մեծացել է և ձեռնարկվել են քաղաքացիների և իշխանությունների աջակցության տարբեր միջոցառումներ:
«Նոր նախագծով առաջարկվում է Արցախին հատկացնել շուրջ 8,8 միլիարդ դրամ, որից 1,2 միլիարդ դրամը (մոտ 2,42 միլիոն դոլար) կուղղվի քաղաքացիների կոմունալ ծառայությունների վճարմանը, մնացածը կտրամադրվի Արցախին միջպետական վարկի շրջանակներում»,- ասաց Ջանջուղազյանը։
Նա նշեց, որ քանի որ նախատեսված պետական վարկի հնարավորություններն օգտագործվել են Արցախի տնտեսության փաստացի պարապուրդի պատճառով, անհրաժեշտություն է առաջացել հատկացնել լրացուցիչ միջոցներ:
Ընդհանուր առմամբ, Արցախին տրամադրվող Հայաստանի օգնությունը կազմում է 83 միլիարդ դրամ (մոտ 167,3 միլիոն դոլար), որից 53 միլիարդ դրամը (գրեթե 106,9 միլիոն)՝ ընդունված աջակցության 14 ծրագրերի շրջանակներում: