Կա վստահություն, որ Արցախը մնալու է հայկական, անկախ ու չի հանձնվելու, հայտարարել է նախկին պետնախարար Ռուբեն Վարդանյանը «Արցախի միջազգային ճանաչման հրամայականը» խորագրով համաժողովին:
«Վստահ եմ, որ Արցախի անկախությունը գալիս է առաջին հերթին ոչ այնքան միջազգային կազմակերպությունների կողմից այդ փաստն ընդունելուց, որքան մեր ներքին ցանկությունից»,- ընդգծել է Վարդանյանը:
Նա վստահեցրել է, որ արցախցիների մեծամասնությունն այդպես է մտածում, իրենք չեն տեսնում իրենց ոչ մի ուրիշ տարբերակում, բացի անկախ լինելուց:
«Միևնույն ժամանակ, մենք ունենք խնդիր, մարդիկ կորցրել են հավատն իրենք իրենց նկատմամբ, հավատն արդարություն, ղեկավարության և ապագայի նկատմամբ: Եթե չունես հավատ, շատ դժվար է պայքարելը»,- ասել է նա։
Նա նշել է, որ Արցախն ունի սոցիալ-տնտեսական բնույթի խորքային խնդիրներ, կան սուբյեկտայնության, անվտանգության խնդիրներ։
«Մեր գլխավոր թշնամին մեր ներսում է, ոչ թե դրսում, մենք պետք է հասկանանք, որ ապրելով առօրյա խնդիրներով՝ հնարավոր չի լինելու իրականացնել այն խնդիրները, որ ստեղծվել են Արցախի շուրջ»,- ասել է Վարդանյանը։
Նա նշել է, որ լսելով պատմություններ այն մարդկանց մասին, ովքեր սկսել են 1988 թվականին ազատագրական շարժումը, մեծ տարբերություն է տեսնում ներկայիս իրավիճակի հետ։
«Այն ժամանակ մարդիկ հավատում էին և պատրաստ էին ամեն օր՝ 24 ժամ, նվիրվել Արցախի անկախության գործին»,- ասել նա։