Արցախն Ադրբեջանի կազմում միայն մեկ ապագա կունենա՝ եղեռն բան է սպասում՝ ցեղասպանություն, հայտարարել է Արցախի արտգործնախարար Դավիթ Բաբայանը։
«Մենք գտնվում ենք, առանց չափազանցության, մեր պատմության ամենաբարդ ժամանակահատվածում։ Մենք դարեր շարունակ անցել ենք շատ բարդությունների միջով, ունեցել ենք կորուստներ, բայց հիմա մեր առջև դրված է մեր ժողովրդի, մեր պետականության ապագայի հարցը։ Մենք պետք է սա քաջ գիտակցենք։ Հիմա որոշվում է ոչ միայն Արցախի, այլև հայ ժողովրդի, Հայոց պետականության ճակատագիրը»,- ասել է նա հինգշաբթի Արցախի ԱԺ արտահերթ նիստի ժամանակ։
Անդրադառնալով Հայաստանի վարչապետ Նիկոլ Փաշինյանի հնչեցրած թեզին Արցախի կարգավիճակի հարցում նշաձողն իջեցնելու մասին՝ Բաբայանն ասել է, որ իրենք այլևս նշաձողեր չունեն։
«Մենք ունենք կարմիր գծեր։ Եվ այս կարմիր գծերը հատելը ուղղակի աղետի կբերի։ Քանի որ Ադրբեջանի կազմում Արցախը մեկ ապագա ունի՝ ցեղասպանություն. Կկորցնենք մեր հայրենիքը. Ահա այսպիսի ապագա մենք իրականում ունենք։ Արցախի կորստից հետո Հայաստանի գոյությունը կանխորոշված կլինի։ Հայաստանի Հանրապետություն չի լինի, դա ժամանակի հարց է. Շատ արագ այս հարցը կլուծվի, իհարկե, ի վնաս հայ ժողովրդի»,- ընդգծել է նա։
Հիշեցենք, որ ապրիլի 12-ին ՀՀ վարչապետ Նիկոլ Փաշինյանը խորհրդարանում հայտարարեց, որ միջազգային հանրությունը կոչ է անում Հայաստանին իջեցնել Լեռնային Ղարաբաղի կարգավիճակի հարցում նշաձողը, հակառակ դեպքում չի կարողանա օգնություն ցուցաբերել հայկական կողմին։ Այս հայտարարությունը լայն արձագանք առաջացրեց։
Միաժամանակ ԱԳՆ ղեկավարը ասել է, որ ոչ ոք չի կարող դեմ լինե խաղաղությանըլ, բայց պետք է հասկանալ, որ դասական իմաստով իդեալական խաղաղություն գոյություն չունի։
«Խաղաղությունը հավասարակշռություն է. Այս հավասարակշռությունը պետք է պահպանվի։ Կայունությունը կարելի է պահպանել հենց հավասարակշռության միջոցով։ Նման հնարավորություններ իսկապես կան»,- ասել է նա։
Բաբայանը պնդել է, որ գոյություն չունի նաև միջազգային հանրության հավաքական տեսակետ։
«Միջազգային հանրությունը բազմաշերտ և բազմազան երևույթ է։ Ավելին, այնպիսի պառակտման մեջ, որ տեսնում ենք հիմա, միջազգային հանրությունը վերջին անգամ եղել է, հավանաբար, 1935-1945թթ. Մենք տեսնում ենք, թե ինչ աշխարհաքաղաքական պայքար է ընթանում. Հետևաբար, չկա մեկ միասնական միջազգային կարծիք»,- ասել է նա:
Սա, ըստ արտգործնախարարի, նշանակում է, որ աշխարհաքաղաքական իմաստով կան հնարավորություններ փրկելու և պահպանելու Արցախը, ավելին՝ փրկելու Հայաստանը։
«Աշխարհաքաղաքականության մեջ օրենք կա՝ պետք է սկզբունքներ ունենալ և հետևել դրանց: Եթե ունես սկզբունք՝ դառնում ես սուբյեկտ, եթե չունես՝ դառնում ես օբյեկտ, այսինքն՝ քեզ հետ այլևս հաշվի չեն նստում»,- ասել է նա։
Ամփոփելով՝ Բաբայանն ընդգծել է, որ, որ Արցախը դիվանագիտական դաշտում կձեռնարկի բոլոր անհրաժեշտ քայլերն՝ «փրկելու այն, ինչ մնացել է Արցախից»։
«Պետք է համախմբվել, ճիշտ աշխատել, հնարավորինս զերծ մնալ շահարկումներից, քանի որ այս պահը շատ կարևոր է։ Իսկ եթե ճիշտ աշխատենք, կհասնենք մեր նպատակին։ Իսկ մեր նպատակը մեկն է՝ փրկել Արցախը, փրկել մեր երկիրը։ Բոլոր հնարավորությունները կան։ Մենք ուղղակի իրավունք չունենք հենց այնպես մեզ պարտված զգանք, անիծված ենք լինելու Աստծո և բոլորի կողմից»,- ասել է ԱԳ նախարարը։
Արցախի Ազգային ժողովը արտահերթ նիստից հետո հայտարարություն է ընդունել, որում շեշտվում է, որ Հայաստանի և Ադրբեջանի «խաղաղության» օրակարգում Ադրբեջանին Արցախի բռնակցման շուրջ ցանկացած բանակցային գործընթաց, ինչպես նաև բխող փաստաթղթի ստորագրումը խարխլում է ոչ միայն Արցախի պետականությունը, այլև արցախահայության՝ պատմական հայրենիքում ապրելու անքակտելի իրավունքը։
Պատգամավորները Հայաստանի իշխանություններից պահանջել են հրաժարվել իրենց ներկայիս աղետալի դիրքորոշումից՝ առաջնորդվելով բացառապես այս արժեքներով, ինչպես նաև ընդգծել, որ ոչ մի իշխանություն իրավունք չունի խաղաղության պատրվակով իջեցնել բանակցային նշաձողը մինչև Արցախի համար անընդունելի կարգավիճակ, ինչպես նաև միջազգայնորեն ճանաչված ինքնորոշման իրավունքից ցած։