Ադրբեջանի կողմից Արցախի շրջափակումը միայն հայ ժողովրդի խնդիրը չէ։ Սա ողջ քաղաքակիրթ աշխարհի խնդիրն է, ասաց հինգշաբթի Արցախի ԱԳՆ նորանշանակ ղեկավար Սերգեյ Ղազարյանը։
«Արցախի շրջափակման մեկ ամիսը» թեմայով Ստեփանակերտ-Երեւան հեռուստակամուրջի ժամանակ նախարարն անդրադարձավ միջազգային հանրության արձագանքին։
Նա առանձնացրեց դեկտեմբերի 20-ին Հայաստանի խնդրանքով տեղի ունեցած ՄԱԿ-ի Անվտանգության խորհրդի արտակարգ նիստը, որի ժամանակ Ադրբեջանին ուղղված կոնկրետ հասցեական հայտարարություններ են արվել Ֆրանսիայի, ԱՄՆ-ի, Իռլանդիայի, մի շարք այլ երկրների, ինչպես նաև միջազգային կազմակերպությունների կողմից. Human Rights Watch, Genocide Watch-ը պահանջում է դադարեցնել Արցախի շրջափակումը, Freedom House, Amnesty International.
Նախարարը նշեց, որ ակտիվ համագործակցություն է հաստատվել Արցախում հումանիտար ճգնաժամի կարգավորմանն աջակցելու նպատակով Հայաստանի կառավարության ստեղծված աշխատանքային խմբի հետ։
«Արցախի մի խումբ քաղաքացիներ՝ հիմնականում առողջական խնդիրներ ունեցող, գտնվում են Արցախում, նրանց խնդիրները լուծվում են»,- ասաց Ղազարյանը։
Արցախի և Լաչինի միջանցքի շրջափակման 32-րդ օրը
Ադրբեջանի հերթական սադրանքի արդյունքում դեկտեմբերի 12-ի առավոտից Արցախի Հանրապետությունը գտնվում է շրջափակման մեջ, խախտվել են երկրի 120.000 բնակչության, այդ թվում՝ 30.000 երեխայի իրավունքները։
Ադրբեջանական կողմը, իբր «էկոլոգիական նկատառումներով», շարունակում է ամբողջությամբ փակ պահել Ստեփանակերտ-Գորիս միջպետական մայրուղին, որը Արցախը Հայաստանի հետ կապող միակ ճանապարհն է։ Արդյունքում 1100 մարդ, այդ թվում՝ 270 երեխա, չեն կարողանում տուն վերադառնալ։
Դեկտեմբերի 13-16-ը Ադրբեջանը դադարեցրել էր գազի մատակարարումն Արցախ։
Հունվարի 9-ից վնասվել է Արցախը Հայաստանից սնուցող միակ միակ բարձրավոլտ գիծը՝ Ահավնո-Բերձոր հատվածում, որը ադրբեջանական կողմի վերահսկողության տակ է։ Ադրբեջանական կողմը թույլ չի տալիս էլեկտրահաղորդման գծերի վերանորոգման և վերականգնման աշխատանքներ իրականացնել, ինչի կապակցությամբ Արցախում հոսանքազրկումներ են տեղի ունենում։
Ներկայումս հանրապետությունն ապրում է ռեսուրսների, սննդի, դեղորայքի և այլ կենսական նշանակության ապրանքների խնայողության ռեժիմով։
