Արցախի պետնախարար Ռուբեն Վարդանյանը հարցազրույցներ է տվել ֆրանսիական Marianne և La Vie հրատարակություններին, ներկայացնելով Ադրբեջանի կողմից հանրապետության շարունակվող 13-օրյա շրջափակման հետևանքով ստեղծված իրավիճակը, ինչպես նաև հնչեցրել դրա լուծման ուղիների իր տեսլականը, տեղեկացնում է պետնախարարի գրասենյակի մամլո ծառայությունը։
Marianne-ին տված հարցազրույցում նա նշել է, որ միայն միջազգային ճնշումը կարող է մանդատ տալ ռուս խաղաղապահներին և ստիպել մարդասիրական օդային միջանցք բացել Արցախի բնակչության սննդի և դեղորայքի կարիքները բավարարելու համար։
«Խնդիրն այն է, որ մենք բոլոր կողմերից արգելափակված ենք Ադրբեջանի կողմից, որը միշտ պատրվակ կգտնի փակելու ճանապարհը և թույլ չի տա մեզ ապրել։ Ստեփանակերտի օդանավակայանն այժմ չի գործում Ադրբեջանի սպառնալիքների պատճառով, սակայն լիովին պատրաստ է շահագործման։ Եվ մենք հուսով ենք, որ Ռուսաստանի Դաշնությունը, ԱՄՆ-ն և Ֆրանսիան կկարողանան համաձայնության գալ և ճնշում գործադրել Ադրբեջանի կոռումպացված ռեժիմի վրա»,- ասել է նա՝ խոսելով Ադրբեջանի կողմից Արցախի շրջափակման արդյունքում ստեղծված իրավիճակի հանգուցալուծման հնարավորությունների մասին։
Վարդանյանի խոսքով, «աշխարհը պետք է իմանա, որ Արցախի ժողովուրդը շատ ուժեղ է ու միասնական, բայց պետք է զգա, որ մենակ չէ մարդկության համար այս պայքարում»։
Խոսելով ադրբեջանական կողմի առաջ քաշած կեղծ բնապահպանական պահանջների մասին՝ Արցախի պետնախարարն ասել է, որ եթե բնապահպանությունն իսկապես անհանգստացնում է Բաքվին, ապա Արցախը պատրաստ է ընդունել ՄԱԿ-ի կողմից պատվիրակված բնապահպանական փորձագետների միջազգային հանձնաժողովը, որը կկարողանա ստուգում անցկացնել։
La Vie-ին տված հարցազրույցում, ի պատասխան հարցին, թե ինչպես է միջազգային հանրությունը արձագանքում ստեղծված իրավիճակին, Վարդանյանը նշել է, որ ականատես ենք երկակի ստանդարտների վառ օրինակի։
«Մեզ վրա հարձակվել է ավտորիտար, ոչ ժողովրդավարական ռեժիմը, որը չի հարգում մարդու իրավունքները իր երկրում, լռեցնում է մամուլի ձայնը, ներգրավված է փողերի լվացման և կոռուպցիայի մեջ համաշխարհային մասշտաբով… Բայց այս ռեժիմը որևէ պատժամիջոցների չի ենթարկվել, իսկ միջազգային լրատվամիջոցներն ու հանրությունը, հիմնականում, լռում են։ Այս անտարբերությունը մեզ սարսափեցնում է»,- շեշտել է նա։
Հարցին, թե հնարավո՞ր է խաղաղություն Ադրբեջանի հետ, Արցախի պետնախարարն ասել է, որ երկու ժողովուրդների միջև շատ բռնություններն ու մահեր են եղել, իսկ ադրբեջանական դպրոցներում տարիներ շարունակ հայերի նկատմամբ ատելություն է սերմանվել։
«Խաղաղության ուղի գտնելը քայլ առ քայլ, երկար գործընթաց է լինելու»,- ասել է նա։
Վարդանյանը, դիմելով Ֆրանսիային, հիշեցրել է, որ ցեղասպանությունից հետո երկիրը եղբայրական վերաբերմունք է դրսևորել հայերի նկատմամբ։
«Ես պարզապես ուզում եմ ֆրանսիացիներին ասել՝ թույլ մի տվեք, որ ողբերգությունը տեղի ունենա երկրորդ անգամ: Մի բավարարվեք հետագայում մեզ օգնության ձեռք մեկնելով, կանխեք այն, ինչ կարող է պատահել: Միշտ ավելի լավ է խուսափել աղետներից, քան ստիպված լինել կառավարել դրանք...»,- ամփոփել է Արցախի պետական նախարարը։