Արցախի պետնախարար Արտակ Բեգլարյանը պատասխանել է Բաքվի 9-րդ համաշխարհային համաժողովում Ադրբեջանի նախագահ Իլհամ Ալիևի ելույթին։
Այսօր Ադրբեջանի նախագահ Իլհամ Ալիևը մի շարք հայտարարություններ է արել, ասելով, մասնավորապես, որ «Լեռնային Ղարաբաղ այլևս գոյություն չունի»։ Նա նաև կոչ է արել հայկական կողմին դադարեցնել բարձրացնել Լեռնային Ղարաբաղի կարգավիճակի հարցն ու հայտարարել, որ «եթե Հայաստանը շարունակի կասկածի տակ դնել մեր տարածքային ամբողջականությունը, Ադրբեջանին այլ ելք չի մնա, քան կասկածի տակ առնել Հայաստանի տարածքային ամբողջականությունը»։
«Այո, Լեռնային Ղարաբաղ գոյություն չունի, քանի որ գոյություն ունի Լեռնային Ղարաբաղի (Արցախի) Հանրապետություն, և սա միջազգային իրավունքի սուբյեկտ է՝ թեև միջազգային մակարդակով պաշտոնապես ճանաչված չէ»,- գրել է Բեգլարյանը Թելեգրամի իր ալիքում։
Նա նշել է, որ ադրբեջանա-ղարաբաղյան հակամարտությունը չի լուծվել և չի լուծվի այնքան ժամանակ, քանի դեռ Ադրբեջանը հաշվի չի առնում Արցախի բնիկ ժողովրդի ինքնորոշման իրավունքը։
Արցախի Հանրապետության միջազգային ճանաչման (հետևաբար՝ կարգավիճակի) հարցը վաղ թե ուշ կլուծվի, և Արցախը երբեք չի լինի Ադրբեջանի կազմում։
«Արցախի Հանրապետության միջազգային ճանաչման (հետևաբար՝ կարգավիճակի) հարցը վաղ թե ուշ կլուծվի, և Արցախը երբեք չի լինի Ադրբեջանի կազմում»,- ընդգծել է նա։
Բեգլարյանը խորհուրդ է տվել Ալիևին ավելի շատ մտածել Ադրբեջանի Սահմանադրությամբ իրեն տրված լիազորությունների բարեխիղճ իրականացման մասին՝ երաշխավորելով սեփական քաղաքացիների իրավունքները՝ հայերի իրավունքների մասին «անհանգստանալու» փոխարեն։
«Գուցե Ալիևը հանկարծ հիշի, թե ինչ է պատահել Խորհրդային Ադրբեջանի ավելի քան 500 հազար հայերի հետ, թե՞ Ադրբեջանի կողմից օկուպացված Արցախի տարածքներում կա գոնե մեկ հայ»,- գրել է նա։