Մեր ԶՈւ–ն արդեն կասեցրել է թշնամու գրոհը, և բանակն ի վիճակի է գործողությունները տեղափոխել Ադրբեջանի տարածք։ Լրագրողների հետ ճեպազրույցի ժամանակ նման հայտարարություն արեց ԱՀ ԱԺ նախագահ Արթուր Թովմասյանը։
«Բանակը պատրաստ է այս մարտի ելքը վճռել այնպես, ինչպես եղավ 1992-94-ին, 2016-ի ապրիլյան պատերազմի ժամանակ կամ էլ այս տարվա հուլիսյան մարտերի ժամանակ»,-ասաց Թովմասյանը։
Նրա խոսքով` այս պատերազմին խառնվել է նաև Թուրքիան, և այժմ Ադրբեջան–Թուրքիա տանդեմն է աշխատում առաջնագծի երկայնքում։
«էրդողանը հայտարարեց, որ ԵԱՀԿ ՄԽ համանախագահող երկրներն անգործության են մատնված, և սա պետք է ահազանգ լինի ԵԱՀԿ ՄԽ-ի համար: Նա ասում է, որ այդ հարցը կարող է լուծել, այսինքն՝ ըստ Թուրքիայի նախագահի, համանախագահները 30 տարի չեն կարողացել լուծել այն»,- ասաց ԱՀ ԱԺ նախագահը:
Թովմասյանը նշեց, որ Ադրբեջանն իրենց հետ թնդանոթների լեզվով է խոսում, թնդանաթով էլ պատասխան են ստանալու։
Անդրադառնալով Հայաստանի խորհրդարանի կողմից Արցախի ճանաչման հարցին՝ Թովմասյանը նշեց, որ եթե պատերազմը շարունակվի, ՀՀ ԱԺ-ն պետք է քննարկի Արցախի ճանաչման հարցը:
«Մենք հաղթելու ենք Հայաստանի և Սփյուռքի հետ: Այսօրվա Արցախի սահմանները գծված են զոհված ազատամարտիկների արյան գույնով, որն ավելի մգացավ, քանի որ ունենք նոր զոհվածներ, սեպտեմբերյան պատերազմի հերոսներ: Փառք նրանց, որոնց արյան գույնով են նաև ներկված Արցախի սահմանները»,- եզրափակեց Ա.Թովմասյանը:
Արմինե Գևորգյան