Արցախի նորընտիր նախագահ Արայիկ Հարությունյանը խոստացել է անել ամեն հնարավորը ընտրողների հույսերն արդարացնելու համար։
“Արցախի Հանրապետության նախագահի ընտրություններում ժողովրդի վստահության բարձր քվեին արժանանալու առթիվ ստացել եմ բազմաթիվ շնորհավորական ուղերձներ, նամակներ, հեռախոսազանգեր: Խոստովանեմ, որ յուրաքանչյուրիդ բարեմաղթանքները յուրովի ջերմություն են փոխանցել ինձ, որոնք նաև պարտավորեցնող են: Ուզում եմ հավաստիացնել, որ կլինեմ յուրաքանչյուր արցախցու նախագահը և կանեմ առավելագույնը բոլոր ընտրողների ու ողջ հայության հույսերն արդարացնելու համար”,- գրել է Հարությունյանը ֆեյսբուքյան իր էջում։
Նա նշել է, որ դրան հնարավոր է հասնել համատեղ ջանքերով ու պատասխանատվությամբ՝ յուրաքանչյուրն իր կարողությունների չափով:
“Այնպես որ ձեզնից յուրաքանչյուրից, որպես հավաքական ներուժի անբաժանելի մասնիկներից, ես ինքս էլ ակնկալիքներ ունեմ։ Միասին մենք կհասնենք այնպիսի հաջողությունների, որոնց մասին չենք էլ երազել”,- գրել է Հարությունյանը:
Ապրիլի 14-ին Արցախում կայացած նախագահական ընտրությունների երկրորդ փուլի արդյունքներով “Ազատ Հայրենիք-ՔՄԴ” թեկնածու Արայիկ Հարությունյանը հավաքել էր ձայների 88 տոկոսն, իսկ ինքնառաջադրված Մասիս Մայիլյանը՝ 12 տոկոս։