Արցախի նախագահ Արայիկ Հարությունյանն Արցախյան երրորդ պատերազմում զոհված և անհայտ կորած զինծառայողների հարազատների միության մի խումբ անդամների հետ հանդիպման ընթացքում անդրադարձել է շփման գծում վերջին սրացումներին և Արցախ - Հայաստան այլընտրանքային ճանապարհի խնդրին։
Ինչպես տեղեկացնում է Արցախի նախագահի աշխատակազմի գլխավոր տեղեկատվական վարչությունը, ըստ Հարությունյանի՝ խոսքը նոր միջանցքի մասին է, որի պահպանությունը, համաձայն 2020 թվականի նոյեմբերի 9-ի եռակողմ հայտարարության, իրականացնելու են Արցախում տեղակայված ՌԴ խաղաղապահները:
Ավելի վաղ հայտնի էր դարձել, որ մինչև օգոստոսի 25-ը Ադրբեջանին կփոխանցվեն Արցախի Աղավնո, Բերձոր և Ներքին Սուս գյուղերը, որոնք գտնվում են Լաչինի միջանցքի երկայնքով։
Հանրային հեռուստաընկերության ռեպորտաժում նշվում է, որ այլընտրանքային ճանապարրհի ընդհանուր երկարությունը 11,8 կմ է, այն սկսվում է Ստեփանակերտ- Բերձոր մայրուղու 36-րդ կմ-ից՝ Բերձորի ենթաշրջանի Մեծ Շենի խաչմերուկից։ Ճանապահի 21-անոց հատվածը կառուցել է ադրբեջանական կողմը։
Աղավնո գետի նոր կամրջից դեպի Կոռնիձոր աշխատում է 3 հայկական ընկերություն, նրանք խնդիր ունեն 8 ոլորանով միանալ կամրջին:
Շինարարները նախատեսում են մինչև 2023 թ-ի գարնան սկիզբ ավարտել բոլոր տեսակի, այդ թվում՝ բետոնային աշխատանքները։
Օգոստոսի 25-ից հետո՝ մինչև շինարարության ավարտը, Հայաստանի և Արցախի միջև ցամաքային հաղորդակցությունը կիրականացվի 4,5 կմ երկարությամբ խճապատ ճանապարհով, որն այս օրերին վերակառուցում է Արցախի շինարարական ընկերություններից մեկը։