Արցախի նախագահ Արայիկ Հարությունյանը շաբաթ օրը հրավիրել է Անվտանգության խորհրդի նիստ, հայտնում է հանրապետության ղեկավարի աշխատակազմի գլխավոր տեղեկատվական վարչությունը:
Քննարկվել են Հանրապետության առջև ծառացած ներքին և արտաքին մարտահրավերների հաղթահարմանը վերաբերող հարցեր:
Երկրի ղեկավարը պետական գերատեսչությունների պատասխանատուներին մի շարք հանձնարարականներ է տվել կարճաժամկետ ու երկարաժամկետ անելիքների վերաբերյալ:
Լարվածության սրացում Արցախում
Մարտի սկզբից ադրբեջանական զինուժն ավելի ինտենսիվ գնդակոծում է Արցախի բնակավայրերն, այդ թվում՝ ականանետերից և խոշոր տրամաչափի զինատեսակներից։ Բացի այդ, ադրբեջանական կողմից սահմանային գոտում հայերենով բարձրախոսներով պարբերաբար գյուղը լքելու սպառնալիքներ են հնչում:
Մարտի 8-ի գիշերը (Ադրբեջանի հսկողության տակ գտնվող) Շուշիի մոտ գազատարի վթարի պատճառով դադարեցվել է Հայաստանից Արցախ գազամատակարարումը։ Ադրբեջանական կողմը խոչընդոտում է գազատարի վերանորոգման աշխատանքների իրականացմանը և հարակից տարածքի ականազերծմանը։ Արցախի Անվտանգության խորհրդի գրասենյակի աշխատակիցները ռուս խաղաղապահների հետ բանակցություններ են վարում ադրբեջանական կողմի հետ։ Վերանորոգման աշխատանքներից հետո մարտի 19-ին Արցախի գազամատակարարումը վերականգնվել է։