բավ է պառակտվել
23-12-2019 12:42

Ռազմական գործողությունների վտանգն էականորեն մեծացել է․ Դավիթ Շահնազարյան

Բանակցային գործընթացում այսօր ունենք մեզ համար ձեռնտու օրակարգի կորուստ. խոսքը Վիենա-Սանկտ Պետերբուրգ-Ժնև օրակարգի մասին է: Այս մասին «Ոսկանապատ» վերլուծական կենտրոնի համաժողովում ասաց քաղաքական գործիչ Դավիթ Շահնազարյանը՝ անդրադառնալով բանակցային գործընթացին:
«Դեռ 2012 թվականից այս հարցը քննարկվում էր, իսկ 2016-ի ապրիլից հետո սա միակ հարցն էր, և խոսքը վերաբերում էր Արցախ-Ադրբեջան շփման գծին, այլ հարց չէր քննարկվում, իսկ Ադրբեջանը ծուղակի մեջ էր: Ցավոք սրտի, հիմա այդ օրակարգը կորցված է հենց Հայաստանի իշխանությունների ջանքերով»,- ասաց նա:
Շահնազարյանը ասում է,որ ՀՀ ներկայիս իշխանությունները, գալով իշխանության, անմիջապես հարց բարձրացրեցին, որ Արցախի Հանրապետության իշխանությունները պետք է անպայման մասնակցեն բանակցային գործընթացին:

«Դա արվել էր լրիվ ոչ պրոֆեսիոնալ ձևով: Ներկա իշխանություններին թվում էր, թե մի հայտարարությամբ դա կարելի է անել՝ չհասկանալով, որ դա տարիների բազմակողմանի աշխատանքի արդյունք է: Ունենք մի իրավիճակ, երբ այսպես կոչված Լեռնային Ղարաբաղի ադրբեջանական համայնքն, ըստ էության, լեգտիմություն է ստանում: Այդ մասին արդեն ԵԱՀԿ Մինսկի խմբի եռանախագահող պետությունների ներկայացուցիչն են նշել: Միջազգային վերլուծական կենտրոնները հիմա առաջ են քաշում այդ չափազանց վտանգավոր հարցը»,- ասաց բանախոսը:
Ըստ Շահնազարյանի բանակցությունների հիմքում ընկած ինքնորոշման հարցը էապես թուլացել է, և ներկայիս իշխանությունները գրեթե այդ հարցը չեն հետապնդում:
«Հայաստանի իշխանությունների կողմից վարվող քաղաքականության արդյունքում Ադրբեջանը ստացել է նոր, մեծ քանակությամբ փաստարկների զինանոց, որ կարող է միջազգային հանրության առաջ արդարացնել իր, այսպես ասած, հերթական ռազմական հարձակումը: Նրա խոսքով, ցավալի հանգամանք է այն, որ առաջին անգամ միջազգային հանրությունն ու Ադրբեջանը մի դիրքում են, Հայաստանը, կարծես թե, մի այլ դիրքում, այդ իմաստով մեկուսացված է:»,- նշեց նա:
Շահնազարյանի խոսքով ռազմական գործողությունների վտանգն էականորեն մեծացել է և պատերազմ կարող է սկսվել ցանկացած պահի։
«Սեղանին դրված է, այսպես կոչված, փուլային տարբերակ։ Սա ասվել է ԱՄՆ-ի, Ռուսաստանի կողմից։ Ի՞նչ է սա նշանակում. սա նշանակում է, որ կարգավիճակի հարցը դրվում է մի կողմ։ Բանակցությունների սեղանին դրված է շրջանների հանձնման փաստաթուղթ։ Սա բացարձակ աբսուրդ է։ Պատկերացրեք, եթե անգամ համաձայնություն է լինելու ինչ որ մի քանի գյուղեր «վերադարձնել» Ադրբեջանին, ինչ կսկսվի Արցախի Հանրապետությունում: Արդյոք կա երաշխիք, որ այս դեպքում արցախցին ամուր կմնա իր հողի վրա, ինչպես մինչև հիմա մնացել է: Սա է վտանգի տակ դրվում: Ովքեր կողմ են դրան, առաջին հերթին թող գնան Մատաղիսում բնակություն հաստատեն, նոր դրանից հետո փորձեն դա անել»,- ասաց վերլուծաբանը:
Ըստ Շահնազարյանի՝ Հայաստանի իշխանությունների նպատակն է՝ Արցախում ձևավորել իրենց ամբողջապես ենթակա իշխանություն, որոնք նույնպես համաձայնություն կտան այս՝ փուլ առ փուլ տարբերակին:
«Վերջերս, բոլորովի հանկարծ, իմացել եմ, որ ՀՀ արտաքին քաղաքականության տրամաբանության փոփոխություն է եղել: Իսկ այս ազդակները շատ անհանգստացնում են ոչ միայն իրենց, այլևս ընդհանրապես միջազգային հանրությանը, փորձում են հասկանալ, թե ինչ է կատարվում»,–ասաց Շահնազարյանը:

 

Արմինե Գևորգյան

«Մեր դիրքորոշումը հստակ է` ռազմական գործողությունները պետք է դադարեն» . ՀՀ-ում ՌԴ արտակարգ եւ լիազոր դեսպան.
«Վտանգում ենք Արցախի սուբյեկտայնությունը». Արմինե Ադիբեկյան
Հայաստանում խայտառակ են որակել Ադրբեջանի ռազմական գործողությունները Ղարաբաղում
Մնացականյանը ԱՄՆ պետքարտուղարին տեղեկացրեց Արցախում Ադրբեջանի կողմից իրականացված ռազմական հանցագործությունների մասին
Անհնար է հաղթել մի ժողովրդի, որը ժամերի ընթացքում վերածվում է կուռ ու միասնական բանակի․ Արայիկ Հարությունյան