Բավ է պառակտվել
10-12-2022 16:59

Ռուբեն Վարդանյանը՝ հայկական Արցախը երջանիկ դարձնելու, ցավոտ որոշումների ու կառավարության ձևավորման սկզբունքների մասին

1988 թվականից ի վեր դրված նպատակը, որ Արցախը լինի հայկական, զարգացած ու երջանիկ, չի փոխվել, սակայն հավատը, որ դա իրականություն կդառնա, նվազել է, ասել է Արցախի պետնախարար Ռուբեն Վարդանյանը։

«Մարդիկ չեն հավատում ապագային, չեն հավատում առաջնորդներին և ղեկավարներին, ուստի կասկած կա, արդյոք հնարավոր է հասնել այդ նպատակին: Վստահ եմ, որ այս նպատակին կարելի է հասնել, դա մեզանից մեծ ջանք ու աշխատանք է պահանջում»,-ասել է նա Արցախի հանրային հեռուստատեսությանը տված հարցազրույցում։

Խոսելով այս նպատակին հասնելու կոնկրետ քայլերի մասին՝ Վարդանյանը նշեց մի քանիսը։.

«Առաջինը, մենք պետք է վերանայենք ընդհանուր մոտեցումը կառավարմանը: Մենք պետք է հասարակությանը վերադարձնենք ղեկավարության հանդեպ հավատը, քանի որ եթե ճգնաժամի ժամանակ չես վստահում քո առաջնորդներին, ոչինչ չես կարող անել»,- ընդգծեց նա։

Որպես երկրորդ քայլ՝ պետնախարարը նշեց, որ մարդիկ պետք է հասկանան, որ ներկայիս շրջափակման պայմաններում հաղթելու միակ ճանապարհը համախմբումն է։

«Եվ երրորդ՝ մենք պետք է ընդունենք, որ փոփոխություններն անխուսափելի են։ Մենք պետք է փոփոխություններ անենք, և այս փոփոխությունները շատ ցավալի արձագանքներ կունենան»,- ասաց նա՝ հավելելով, որ առաջին հերթին նման արձագանքը կլինի վերնախավի կողմից։

Այս առնչությամբ նա պարզաբանեց, որ հասարակության և տնտեսության մեջ տիրող ընդհանուր մթնոլորտը ստեղծել է «հիվանդ» իրավիճակ, երբ հարուստ մարդիկ ավելի շատ բանից են օգտվում, քան հասարակ մարդիկ։ Նա հայտարարեց, որ դա իր համար անընդունելի է, և որ դա անպայման կփոխվի։

«Նոր փուլը պահանջում է նոր գաղափարներ, նոր մոտեցումներ, նոր ծրագրեր, կառավարման նոր մեթոդներ»,- ընդգծեց նա։

Խոսելով կառավարության ձևավորման ժամկետների մասին՝ պետնախարարը նշեց, որ նախ պետք է սահմանել նպատակները, հետո՝ կառավարման մոտեցումներն ու ռեսուրսները։

«Այս (գործընթացում) կձևավորվի թիմ, որը կընդունի այդ նպատակների կարևորությունը»,- ասաց նա՝ հավելելով, որ թիմում կարող են լինել ինչպես նախկին նախարարներ, այնպես էլ նոր մարդիկ, այդ թվում՝ ոչ արցախցիներ, ինչը թույլ կտա երկրին. օգտագործել հայկական ներուժը.
Վարդանյանը նաև ասաց, որ Արցախի քաղաքական ուժերի հետ «պաշտոններ բաշխելու» պայմանավորվածություններ չկան՝ հավելելով, որ այս հարցում 100 տոկոսանոց մանդատ ունի՝ ընտրելու այն մարդկանց, ում անհրաժեշտ է համարում։

«Իհարկե, ես լսում եմ տարբեր մարդկանց կարծիքները, խորհրդակցում եմ տարբեր խմբերի հետ և ինքնուրույն որոշումներ եմ կայացնում։ Այս որոշումների համար պատասխանատվությունը ես եմ կրելու»,- ընդգծեց նա։

Ռուբեն Վարդանյանի ուղերձը արցախցիներին (31.12.2022)
Ռուբեն Վարդանյանը՝ գերմանական հեռուստաալիքին տված հարցազրույցում. Արցախի ժողովուրդը չի տեսնում իր ապագան Ադրբեջանի կազմում
Արցախն առանձին սուբյեկտ է, որը պետք է մասնակցի իր ապագայի վերաբերյալ որոշումների կայացմանը. Ռուբեն Վարդանյան
Ռուբեն Վարդանյանը համաձայնել է ստանձնել Արցախի պետնախարարի պաշտոնը
Ռուբեն Վարդանյանի ելույթը Համաժողովրդական հանրահավաքին Արցախում