Ռուբեն Վարդանյանը հայտարարել է, որ մտադիր չէ հրաժարական տալ Արցախի պետքարտուղարի պաշտոնից։
«Ես չեմ պատրաստվում հրաժարական տալ, առավել ևս՝ ստեղծված իրավիճակում։ Միևնույն ժամանակ, անընդունելի է երկրի նախագահի, հետևաբար՝ նաև խորհրդարանի հնարավոր հրաժարականը։ Բոլորիս ջանքերը պետք է բազմապատկել՝ հաղթահարելու Արցախի առաջ ծառացած մարտահրավերները։ Այս իրավիճակում մենք թշնամու օրակարգը սպասարկելու և հանձնվելու իրավունք չունենք: Մենք հիմա Արցախը հայկական պահելու իրական հնարավորություն ունենք: Բոլորին քաղաքական ողջախոհության և համերաշխության կոչ եմ անում»,- գրել է նա ֆեյսբուքյան իր էջում:
Շուրջ երկու ժամ առաջ հայկական հեռագրային հատվածում սկսեցին արագորեն տարածվել խոսակցություններն այն մասին, որ Վարդանյանը պատրաստվում է հրաժարական տալ։ Անգամ շոշափվում էր նրա հավանական իրավահաջորդի՝ Արցախի ՆԳ նախարար Կարեն Սարգսյանի անունը։
Այսօր ավելի վաղ Արցախի Ազգային ժողովի նախագահ Արթուր Թովմասյանը չէր բացառել երկրում ստեղծված ճգնաժամային իրավիճակը հաղթահարելու համար արտահերթ խորհրդարանական և նախագահական ընտրությունների անցկացումը։ Նա չէր բացառել իր մասնակցությունը ընտրություններին։ .
Առաջադրվելու մտադրության մասին հայտարարել է նաև օրեր առաջ պաշտոնանկ արված Արցախի ԱԳ նախկին նախարար, Պահպանողական կուսակցության նախագահ Դավիթ Բաբայանը։
