Արցախի Հանրապետության պետական նախարար, քաղաքացիական պաշտպանության ղեկավար Ռուբեն Վարդանյանն հայտարարել է, որ իր գլխավորությամբ կառավարությունում կստեղծվի օպերատիվ շտաբ։ Այն կաշխատի շուրջօրյա՝ Արցախը Հայաստանին կապող ավտոճանապարհի արգելափակման հետևանքով ստեղծված իրավիճակում աշխատանքները համակարգելու նպատակով, հայտնում է պետնախարարի մամուլի ծառայությունը։
Նշելով, որ իրավիճակը բավականին բարդ է, և փաստորեն Արցախը գտնվում է շրջափակման մեջ, պետնախարարը միաժամանակ շեշտել է, որ կառավարությունն ունի բոլոր հնարավորություններն ու ներուժը վերահսկելու այն։ Ընդգծելով պետական մարմինների գերկազմակերպված, համակարգված և կարգապահ աշխատանքը՝ Վարդանյանը կարևորել է օպերատիվ հաղորդակցությունը, գերատեսչությունների և վարչական շրջանների միջև արդյունավետ հաղորդակցությունը, ինչպես նաև բնակչության պատշաճ տեղեկատվության ապահովումը։ Գերատեսչությունների ղեկավարները պետնախարարին զեկուցել են իրենց վստահված ոլորտներում տիրող իրավիճակի մասին՝ զեկուցելով առկա պաշարների և ռեսուրսների մասին: Պետական նախարարը կարգադրել է գույքագրում անցկացնել և տեղեկատվություն տրամադրել հրատապ խնդիրների վերաբերյալ։
Ինչպես հայտնում են Արցախի ՆԳՆ-ից, Ադրբեջանի հերթական սադրանքի արդյունքում Արցախի Հանրապետությունը 24 ժամ դե ֆակտո շրջափակման մեջ է, խախտվել են հազարավոր քաղաքացիների իրավունքները։ Ստեփանակերտ-Գորիս միջպետական ավտոճանապարհը, որը Արցախը Հայաստանի հետ կապող միակ երթուղին է, շարունակում է երկկողմանի փակ մնալ։