Վերջին 24 ժամվա ընթացքում ռուսական խաղաղապահ զորախմբի պատասխանատվության գոտում ադրբեջանական զինուժի կողմից Սարիբաբ և Բուզդուխ լեռների, ինչպես նաև Մարտակերտի շրջանում հրադադարի ռեժիմի 4 խախտում է արձանագրվել, ինչի հետևանքով զոհվել է երկու, վիրավորվել Լեռնային Ղարաբաղի զինված կազմավորումների տասնչորս ներկայացուցիչ։
Այս մասին հաղորդվում է ղարաբաղյան հակամարտության գոտում ռուսական խաղաղապահ զորախմբի գործունեության մասին ՌԴ ՊՆ օգոստոսի 4-ի տեղեկագրում։
«Ռուս խաղաղապահների հրամանատարության կողմից՝ ադրբեջանական և հայկական կողմերի հետ փոխգործակցությամբ, այդ միջադեպերը հարթվել են։ Կողմերի շփման գծի խախտումներ չեն եղել»,- ասված է հաղորդագրության մեջ։
Լարվածության սրացում Արցախում շփման գծի երկայնքով
Արցախում շփման գծի երկայնքով սրումը սկսվել է օգոստոսի 1-ին՝ ժամը 09:00-ին, երբ ադրբեջանական ստորաբաժանումները Արցախի հյուսիսային և հյուսիսարևմտյան սահմանների մի շարք հատվածներում դիմել են սադրանքների և շփման գիծը հատելու փորձերի, որոնք ճնշվել են. ՊԲ ուժերի կողմից։
Օգոստոսի 3-ին ադրբեջանական զինուժը ականանետերի, նռնականետերի և գրոհային անօդաչու թռչող սարքերի կիրառմամբ հրետակոծել է ՊԲ մարտական դիրքերը և զորամասերից մեկի մշտական տեղակայման վայրը, ինչի հետևանքով երկու պայմանագրային զինծառայող զոհվել է, 19 զինվոր վիրավորվել։ Օգոստոսի 3-ին Արցախի նախագահ Արայիկ Հարությունյանը մասնակի զորահավաք է հայտարարել։
Հայաստանի ԱԳՆ-ն սրացման կապակցությամբ արված հայտարարությունում պատասխանել է Լաչինի միջանցքի և եռակողմ համաձայնագրի պայմանավորվածությունները չկատարելու վերաբերյալ Ադրբեջանի մեղադրանքներին։ Գերատեսչությունը հայտարարել է, որ ռուսական խաղաղապահ զորքերի պատասխանատվության գոտում ագրեսիա է իրականացվել, ինչի հետևանքով կան զոհեր և վիրավորներ։
ԱԳՆ-ն անընդունելի է համարում ադրբեջանական կողմի փորձերը՝ միակողմանիորեն փոփոխել Լաչինի միջանցքում եռակողմ հայտարարության 6-րդ կետով սահմանված իրավական ռեժիմը, և վերահաստատում, որ Լաչինի միջանցքով անցնող երթուղին կարող է փոփոխվել միայն հայտարարությունը ստորագրած կողմերի հաստատած պլանի համաձայն։