Բավ է պառակտվել
19-02-2021 15:05

Արցախում ռուսերենին կարգավիճակ տալու հարցը պետք է հանրային քննարկման դրվի. պատգամավոր

Արցախի Հանրապետության ««Լեզվի մասին» օրենքում փոփոխություններ կատարելու մասին» օրինագծի հեղինակներին առաջարկել եմ կազմակերպել քննարկումներ հանրության լայն շերտերի: Այս մասին ֆեյսբուքյան իր էջում գրել է Արցախի Ազգային ժողովի «Ժողովրդավարություն» խմբակցության պատգամավոր Գեղամ Ստեփանյանը:

«Հաշվի առնելով Արցախի Հանրապետության «Լեզվի մասին» օրենքում փոփոխություններ կատարելու մասին» օրենքի նախագծի և դրանով առաջարկվող փոփոխությունների հետ կապված հանրության ոչ միանշանակ արձագանքը՝ առաջարկել եմ նախագծի հեղինակներին, մինչև Ազգային ժողովի լիագումար նիստում նախագծի քննարկումները, կազմակերպել քննարկումներ հանրության լայն շերտերի՝ մտավորականության, դասախոսական և ուսուցչական կոլեկտիվների, ուսանողության մասնակցությամբ:

Լեզվի մասին օրենքը չի կարող փոփոխվել առանց հանրության շրջանում իրական և համընդհանուր փոխըմբռնման ու համաձայնության և չի կարող չարտահայտել հանրության իրական ցանկությունները»,- գրել է նա:

Հիշեցնենք, որ Արցախում ռուսերենը կարող է ստանալ պաշտոնական լեզվի կարգավիճակ: Ազգային ժողովի երեք պատգամավորների ներկայացրած նախագծում օրենքի 1-ին հոդվածի 2-րդ մասը շարադրվում է հետևյալ կերպ. «Լեռնային Ղարաբաղի Հանրապետության պաշտոնական լեզուներն են՝ գրական հայերենը և ռուսերենը»:

Օրենսդրական փոփոխության հիմնավորուման մեջ նշվում է. «Հաշվի առնելով Արցախի և Ռուսաստանի մշակութային, ռազմական, տնտեսական հարաբերությունների պատմական հիշողությանը և այն փաստը, որ բազմաթիվ արցախցիների համար շփման երկրորդ լեզու է հանդիսանում ռուսերենը` կարևոր ենք համարում նոր որակի հարաբերությունների վերաարժևորումը և նոր օրակարգի ձևավորումը: Այս համատեքստում առաջնահերթ ենք համարում ռուսաց լեզվի կարգավիճակի բարձրացումը, ինչն անհրաժեշտ պայմաններ կստեղծի բոլոր ոլորտներում համագործակցությունը խորացնելու համար, իսկ տեսանելի ապագայում կնպաստի իրավական շրջանակներում հարաբերությունների զարգացմանը:

Արցախում ռուս խաղաղապահների երկարաժամկետ ներկայության և բազմաթիվ սոցիալական և հաղորդակցային խնդիրների համատեղ լուծման անհրաժեշտության ըմբռնումը, շինարարության, առողջապահության, կրթության և գիտության ոլորտներում համագործակությունը պահանջում է ռուսաց լեզվի դերի վերագնահատում»:

Ռուսերենը Արցախում կստանա պետական կարգավիճակ
Պաշտոնական լեզվի փոփոխությունը չունի որևէ հիմնավորում և անհրաժեշտություն. Թանդիլյան
«Արցախի որևէ կարգավիճակ Ադրբեջանի կազմում անհնար է» Արայիկ Հարությունյան
Հայաստանի ՊՆ-ը և Արցախի նախագահը քննարկել են համագործակցությանն առնչվող հարցերը
Ղարաբաղի կարգավիճակի հարցը իսկապես լուծված չէ, բայց դեռ ժամանակը չի. Մեդվեդև