ՀՀ արտաքին գործերի նախարար Զոհրաբ Մնացականյանը ու նաև վարչապետը շատ սերտ աշխատում են Արցախի արտգործնախարար Մասիս Մայիլյանի հետ, աշխատում են նաև Արցախի նախագահի հետ: Այս մասին ԱԺ –ում լրագրողների հետ ճեպազրույցում ասել է ԱԳ Զոհրաբ Մնացականյանը:
«Մենք շատ հստակ ձևաչափ ունենք միասին սերտորեն աշխատելու, որն արտահայտում է մեր կառավարության կողմից նշված քաղաքական գիծը, որը վերաբերում է Արցախի որոշիչ ձայնին այս բանակցային գործընթացում։ Դուք գիտեք, որ Արցախի մասնակցության հարցը բարդ է, բայց սկզբունքային հարց է։ Առանց Արցախի որոշիչ ձայնի մենք առաջընթաց չենք ունենալու», - ասաց Զոհրաբ Մնացականյանը։
Արտգործնախարարը հորդորում է բոլորին, որ չկասկածեն Հայաստանի և Արցախի միասնականության վրա: «Մեր ներսի քննարկումները կարող են շատ բաց և շատ սուր լինել, բայց եթե ինչ-որ մեկը ենթադրել է, որ այդ սրությունը քայքայում է մեր միասնանակությունը, խորհուրդ կտամ՝ չսխալվել»,- ասաց արտգործնախարարը։
Մնացականյանը ասում է,որ այն արտահայտվել է 1991 թվականից ի վեր, իսկ վերջին անգամ էլ 2016 թվականի ապրիլին:
Հիշեցնենք, նախօրեին «Արցախպրես» լրատվական գործակալությանը և «Ազատ Արցախ» թերթին տված հարցազրույցում Արցախի նախագահ Բակո Սահակյանը անթույլատրելի էր համարել միասնականությանը խարխլելուն ուղղված ցանկացած քայլ՝ լինի դա Արցախում, Հայաստանում, թե Սփյուռքում: «Անընդունելի եմ համարում դավադրական պահելաձևն առհասարակ»։
Արմինե Գևորգյան