Դեկտեմբերի 14-18-ը Հովհ. Թումանյանի անվան պետական տիկնիկային թատրոնում կանցկացվի «Կին» միջազգային 10-րդ կինոփառատոնը, հայտնում է ՀՀ մշակույթի նախարարության պաշտոնական կայքը:
Ավանդական դարձած կինոփառատոնի նպատակն է վերաիմաստավորել կնոջ դերը հասարակության մեջ, կինոյի միջոցով լուսաբանել նրա խնդիրները, խթանել Հայաստանում կանանց կողմից ստեղծված ֆիլմերի արտադրությունը, բացահայտել նոր անուններ, ինչպես նաև նպաստել մշակութային երկխոսությանը տարբեր ազգերի միջև:
«Կին» կինոփառատոնը առաջին անգամ անցկացվել է 2003 թվականին. ցուցադրվել են վերջին տասնհինգ տարիներին ստեղծված հայ կին ռեժիսորների ֆիլմերը:
Փառատոնի պատմության ընթացքում ներկայացվել են անվանի կին ռեժիսորներ Ելենա Սականյանի /ԽՍՀՄ/, Լենի Ռիֆենշտալի /Գերմանիա/, Ռուզան Ֆրանգուլյանի /Հայաստան/, Բևերլի Շաֆերի /Կանադա/, Ուլրիկե Օտտինգեր /Ավստրիա/, Նինա Ագաջանովայի /ԽՍՀՄ/, Յանինա Լապինսկայտեի /Լիտվա/, Սյուզանն Խարդալյանի /Շվեդիա/ աշխատանքները:
Կինոփառատոնին մասնակցած հայկական ֆիլմերը ցուցադրվել են Լեհաստանում՝ Կրակովի «Ֆիլմմոր» կանանց փառատոնում, Ռումինիայում՝ «Ալտեռ-Նեյտիվ» կարճամետրաժ ֆիլմերի փառատոնում, Թուրքիայում:
«Կին» միջազգային 10-րդ հոբելյանական փառատոնի ծրագրում ներկայացված է 81 ֆիլմ՝ 27 երկրից: