«Տաշիր» ընկերությունների խումբը հանդես կգա որպես գլխավոր կապալառու Մոսկվայում Օլեգ Տաբակովի թատրոնի բազմաֆունկցիոնալ համալիրի երկրորդ փուլի շինարարության գործում, որի ընդհանուր տարածքը 19.600 քմ է, հայտնում է РИА Новости-ն՝ հղում անելով ընկերության հաղորդագրությանը։
Ինչպես նշվում է հաղորդագրությունում, բազմաֆունկցիոնալ համալիրը, որտեղ պետք է լինի մոսկովյան լեգենդար «Տաբակերկա»-ն, կառուցվում է 2007-ից, իսկ ընթացիկ տարվա սեպտեմբերից համալիրի բոլոր մասերի շինարարությունը շարունակում է «Տաշիր» ընկերությունը։ «Համալիրը ներառում է Օլեգ Տաբակովի թատրոնի շենքը՝ 368 հանդիսատեսի համար նախատեսված սրահով, վարչական-տեխնիկական շենքը, ինչպես նաև ստորգետնյա ավտոկայանատեղի՝ 267 մեքենաների համար»,- ասվում է հաղորդագրությունում։
Նշվում է նաև, որ նախկինում «Տաշիր» ընկերության օգնությամբ ավարտվել է առաջին փուլի շինարարությունը, կարգի է բերվել հարակից տարածքը, ավարտվել են արտաքին և տանիքածածկային աշխատանքները, ինչպես նաև իրականացվել է համալիրի տեխնիկական սարքավորումներով ապահովման աշխատանքների մի մասը։