Կոլումբիական ռեժիսոր Սերխիո Բաբրերան պրոդյուսեր Ուգո Լեոն Ֆերերի հետ համահեղինակությամբ ներկայացրել են լեգենդար գրող, գրականության բնագավառում Նոբելյան մրցանակի դափնեկիր Գաբրիել Գարսիա Մարկեսի կյանքի մասին պատմող հեռուստասերիալի առաջին սերիան:
«Սա գործողություններով, լարվածությամբ և կրքերով լի հեռուստասերիալի առաջին սերիան է: Ֆիլմում կլինեն նաև Գաբոյի (գրողին այդպես են կոչում Կոլումբիայում), կյանքից նախկինում անհայտ անեկդոտներ, որոնք կապված են սնապաշտություններին նրա հակվածության հետ»,- նշում են հեռուստասերիալի ստեղծողները:
Սյուժեի հիմքում ընկած են Մարկեսի բազմաթիվ կենսագրություններն ու նրա հարազատների հիշողությունները: Նկարահանումները սկսվել են 2015թ.: Ընդհանուր առմամբ սերիալը ունենալու է երեք շրջան՝ 13-ական սերիաներով, յուրաքանչյուրի տևողությունը 45 րոպե:
Այժմ կինոնախագծի հեղինակները նկարահանումների շարունակության համար ֆինանսավորում են փնտրում, և նախագծի իրավունքը ակնկալում են վաճառել « Գահերի խաղը», « Ընդհատակյա կայսրություն», և « Սոպրանո կլանը» հանրահայտ սերիալները ստեղծած « HBO» ամերիկյան հեռուստացանցին:
Մեծ գրողի կյանքի մասին պատմող հեռուստանովելի հնարավոր գնորդի դերում կարող է հանդես գալ ամերիկյան «Netflix» վիդեո ծառայությունը, որը հեռարձակում է « Խաղաքարտե տնակ» սերիալը:
Գաբրիել Գարսիա Մարկեսը « Հարյուր տարվա մենություն», «Պատրիարքի աշունը», «Գեներալն իր լաբիրինթոսում» վեպերի և այլ ստեղծագործությունների հեղինակն է: Գրողը գրականության բնագավառում Նոբելյան մրցանակակիր է դարձել 1982թ.:
Մարկեսը մոգական ռեալիզմի ամենավառ ներկայացուցիչներից մեկն է: Գրականության այս ուղղությունն իր մեջ ներառում է իրականության և հորինվածքի, սովորականի և հեքիաթայինի տարրեր՝ լատինաամերիկյան պատմության և մշակույթի անկրկնելիությունը առավել լիարժեք փոխանցելու նպատակով:
Գրողը մահացել է 2014թ.ապրիլին: Այս տարի մարտի 6-ին նա կդառնար 90 տարեկան: