Հայկական ճարտարապետությունն ուսումնասիրող հիմնադրամը շուտով կհրատարակի «Հայաստանի պատմություն»՝ հայրենիքի 10.000 բնակավայրերի մասին 36 հատորյա գրքաշարը, որն արդեն հոկտեմբերին վերջնական տարբերակով կհանձնվի տպարանին: Այս մասին լրագրողների հետ հանդիպմանն հիմնադրամի ղեկավար Սամվել Կարապետյանը:
Նա նշեց, որ Արևմտյան Հայաստանում կատարած ուսումնասիրությունների արդյունքում շատ նոր բացահայտումներ արեցին, դեպի հարավ շատ հետաքրքիր հուշարձաններ արձանագրվեցին, հատկապես՝ Կարսի և Սարիղամիշի շրջաններում:
՛՛Հիմնականում եկեղեցիներ են կամ վանքեր, գնալով գերակշռում են դիմափոր հուշարձանները: Իսկ ավելի մեծ թիվ կազմող քարաշեն կառույցների թիվը պակասել է, ինչ էլ կա, հետքեր են միայն: Նույնիսկ դիմափորները քանդվում են, ժայռերը պայթեցնում են՛՛,-ասաց նա և ավելացրեց, որ, ցավոք սրտի, թուրքական իշխանությունները տասնամյակների ընթացքում հիվանդացրել են իրենց ժողովրդին՝ մշտապես հայկական գանձերի մասին թմբկահարելով, ու մինչև հիմա էլ դեռ թուրքերը հայկական հուշարձանների տակ գանձեր են փնտրում:
Սամվել Կարապետյանը նշեց, որ 36 հատորից բաղկացած մատենաշարի առաջին հատորում խորհրդանշական ձևով որոշել են ներկայացնել Հայոց ձոր գավառի շուրջ հարյուրից ավել գյուղերը:
Հատորները հերթով կողք կողքի դրվելու դեպքում՝ պատմական Հայաստանի քարտեզի պատկերը կստացվի:
՛՛Սա շատ մեծ նախագիծ էր, միայն տպագրությունը մեծ ծախսեր էր պահանջում, և սա մեր հիմնադրամի բյուջեում չէր կարող տեղավորվել, բայց այս մատենաշարը չհրատարակել չէինք կարող: Մտածեցինք բաժանորդագրության ճանապարհը օգտագործել, և հիմա պետք է տարածել բաժանորդագրության մասին, որպեսզի այն հրատարակվի՛՛-ասաց նա։