Լոս Անջելեսում անցկացվել է «խաղային Օսկար» անվանումը ստացած The Game Awards մրցանակի հանձնման արարողությունը:
Պաշտոնական մրցանակաբաշխության մեկնարկից առաջ պարգևատրվել են Pokemon GO-ն` որպես «Լավագույն բջջային խաղ», և REZ Infinite-ն` որպես «Լավագույն խաղ վիրտուալ իրականության համար»:
Մրցանակաբաշխությունը մեկնարկել է «Արդյունաբերության պատկերակ» անվանակարգով, որում հաղթող է ճանաչվել ճապոնացի գեյմ-դիզայներ Հիդեո Կոձիման: Մրցանակաբաշխության ժամանակ տարվա խաղ է ճանաչվել Blizzard ընկերության Overwatch խաղը:
Կայքը գրում է, որ «Լավագույն անկախ խաղ» և «Լավագույն գեղարվեստական ձևավորում» մրցանակները շնորհվել են Inside պլատֆորմերին: «Տարվա դերային խաղ» է դարձել Witcher 3: Blood and Wine-ը, իսկ «Լավագույն վազքային կամ սպորտային խաղ»` Xbox One խաղային կցորդի Forza Horizon 3-ը:
Միջոցառման ժամանակ նաև անցկացվում են բազում նոր խաղերի շնորհանդեսներ և դեբյուտային ցուցադրություններ: Այս անգամ The Game Awards-ի շրջանակում անցկացվել են Mass Effect: Andromeda, Death Stranding և The Legend of Zelda: Breath of the Wild խաղային գործընթացի պրեմիերային ցուցադրությունները:
Նշվում է, որ The Game Awards մրցանակը հիմնել է հաղորդավար Ջեֆ Քիլին 2014 թվականին, երբ լքել է Spike TV-ի VGX նախագիծը: