Դեբեդ գետի վրա նոր կամրջի կառուցման աշխատանքները սկսվել են հուլիսի 9 -ին: Դրա երկարությունը կկազմի մոտ 200 մետր:
Սադախլո-Բագրատաշեն անցակետի տարածքում սահմանամերձ Դեբեդ գետի վրակառուցվող կամրջի շինարարությունը ակտիվ ընթացքի մեջ է, հայտնում է Հայաստանի ճանապարհաշինության վարչությունը:
Այժմ ամրապնդվում և բետոնապատվում են նոր կառույցի հիմքերը: Աշխատանքներն ընթանում են ըստ ժամանակացույցի, ասվում է հաղորդագրության մեջ:
Շինարարության մեկնարկը տրվել է այս տարվա գարնանը: Երկու երկրների ենթակառուցվածքների նախարարները ներկա են գտնվել հիմնարկեքի արարողությանը:
Սա հայ-վրացական համատեղ նախագիծ է, որը ֆինանսավորվում է երկու երկրների կառավարությունների և Վերակառուցման և զարգացման եվրոպական բանկի կողմից: Նախագծի ընդհանուր բյուջեն կազմում է մոտ 9 մլն եվրո, որից 7.2 միլիոնը ՎԶԵԲ-ի վարկն է:
Նախագծի կապալառուն է իրանական Tunnel Sadd Ariana ընկերությունը, տեխնիկական վերահսկողությունն իրականացնում են հարավկորեական Soosung Engineering և Korea Consultants International Co.
Գործող կամուրջը կառուցվել էր խորհրդային տարիներին և նախատեսված չէր միջազգային բեռնափոխադրումների, մասնավորապես՝ ծանր բեռնատարների համար: Նոր կամուրջը երկու անգամ ավելի լայն կլինի (իրականում լինելու է երկու կամուրջ, յուրաքանչյուրը երկու երթևեկելի գոտիով) և նախատեսված է լինելու ոչ միայն մարդատար ավտոմեքենաների, այլև մեծ ավտոբուսների և բեռնատարների համար: