Հայ մաքսավորներն առգրավել են մաքսանենգ ճանապարհով հանրապետություն ներմուծված բջջային հեռախոսների աննախադեպ մեծ խմբաքանակ։
ՊԵԿ մամլո ծառայությունից հաղորդել են, որ օպերատիվ տվյալներ էին ստացվել, որ նախատեսվում է փոստային ծառայություններ մատուցող ընկերություններից մեկի միջոցով ԵԱՏՄ անդամ պետությունից Հայաստանի Հանրապետության տարածք օդային ուղով, մաքսանենգ ճանապարհով ներմուծել հեռախոսներ:
Ձեռնարկված օպերատիվ-հետախուզական միջոցառումների արդյունքում «Զվարթնոց» օդանավակայանի «Կարգո» բեռնային համալիրի տարածքում հայտնաբերվել են
Ռուսաստանի Դաշնությունից Հայաստանի Հանրապետության տարածք ներմուծված 1328 հեռախոս, որոնց շուկայական արժեքը կազմել է մոտ 600 հզ ԱՄՆ դոլար: Որոշ մոդելները հայաստանյան շուկայում վաճառվում են 600,000-ից մինչև 1,200,000 դրամի սահմաններում:
Մաքսանենգ ճանապարհով փորձ է արվել նաև ներկրել մեծ քանակությամբ պլանշետներ, էլեկտրոնային ծխախոտներ և հեռախոսների աքսեսուարներ: Հատկանշական է, որ մաքսանենգ ճանապարհով ներմուծված բեռների բոլոր արկղերի վրա փակցված են եղել միևնույն պիտակները:
Հարուցվել է քրեական գործ, հետաքննիչի կողմից որոշում է կայացվել վերը նշված ապրանքներն առգրավելու մասին։ Նախնական հաշվարկներով պետությանը պատճառվել է առանձնապես խոշոր չափի վնաս, որի վերջնական չափը հստակեցվում է։
Ենթադրյալ հանցանքի համար կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։