Ռուսաստանի հետ ավտոճանապարհային կապը կվերականգնվի երկու ժամվա ընթացքում, հայտնել է ՀՀ էկոնոմիկայի նախարար Վահան Քերոբյանը։
Կիրակի երեկոյան քարաթափման վտանգի պատճառով արգելվել էր երթևեկությունը Վրաստանի Ստեփանծմինդա-Լարս ավտոճանապարհով։
«Հենց նոր զրուցեցի իմ վրացի գործընկեր փոխվարչապետ և էկոնոմիկայի նախարար Լևան Դավիթաշվիլիի հետ, ով հաղորդեց, որ ավտոճանապարհային կապը ՌԴ հետ կվերականգնվի երկու ժամվա ընթացքում»,- գրել է Քերոբյանը ֆեյսբուքյան իր էջում։
Հայաստանն ու Ռուսաստանը կապող միակ ցամաքային երթուղին անցնում է այս ճանապարհով՝ Վերին Լարսի անցակետով։
Արտակարգ իրավիճակների նախարարությունը նաև նշել է, որ Արմավիրի մարզի Լուսագյուղ-Երասխավան հատվածի կամրջի վնասման պատճառով երկկողմ երթևեկությունն իրականացվում է մեկ գոտիով։