Լաստանավային հաղորդակցությունը կսկսի գործել օգոստոսից, առաջիկա օրերին կհրապարակվի չվացուցակը։ Այս մասին «Արմենպրես»-ին է տեղեկացրել ՀՀ էկոնոմիկայի նախարար Վահան Քերոբյանը։
Քերոբյանը նշել է, որ թեև լաստանավային ծառայության գործարկումն ավելի շատ ժամանակ պահանջեց, այն, անշուշտ, կգործարկվի այս ամիս։
«Բոլոր հարցերը լուծված են: Եվ հիմա միակ խնդիրը, որը դեռ պետք է համաձայնեցվի, այն է, որ յուրաքանչյուր ապրանքի համար պետք է թույլտվություն ձեռք բերենք առցանց, որպեսզի կարողանանք տեղափոխել այս կամ այն խմբաքանակը: Եվ կարծես թե մենք պատրաստ ենք հրապարակել չվացուցակը։ Դա կարվի առաջիկա օրերին»,- ասել է Քերոբյանը։
Ավելի վաղ Քերոբյանը հայտարարել էր, որ Հայաստանը նախատեսում է լաստանավային հաղորդակցությունը սկսել 2022 թվականի հունիսի 15-ից։
ՀՀ կառավարությունը որոշում է կայացրել «Փոթի» (Վրաստան) - «Կովկաս նավահանգիստ» (Ռուսաստան) լաստանավային բեռնափոխադրումները 6 ամիս ժամկետով ամբողջությամբ սուբսիդավորելու մասին։ Իսկ մայիսի 5-ին «Սի ընդ Էմ Ինթերնեյշնլ» ՍՊԸ-ն ՀՀ կառավարության որոշմամբ ճանաչվել է Հայաստանից արտահանման և երկիր ներմուծման նպատակով բեռների լաստանավային փոխադրման օպերատոր։