Ռուսական «Գազպրոմն» իր վրա կվերցնի Հայաստանում գազի սակագների նվազեցման ֆինանսավորման հետ կապված ռսիկերը, երկուշաբթի Ազգային ժողովում լրագրողներին ասաց Հայաստանի հանրային ծառայությունների կարգավորման հանձնաժողովի նախագահ Ռոբերտ Նազարյանը:
Նրա խոսքով, հայկական կարգավորիչը մինչև նոյեմբերի վերջը նախատեսում է վերանայել գազի սակագինը, սակայն այն ուժի մեջ կմտնի միայն 2017 թ.-ի հունվարից և կգործի մեկ տարի:
«Բացի այդ, կներդվի սպառողների նոր խումբ` սոցիալապես անապահով ընտանիքներ, որոնց համար սակագները շատ ավելի ցածր կլինեն, քան մնացած սպառողների դեպքում», - ասաց Նազարյանը:
Անդրադառնալով գազի սակագների նվազման հիմքերին, նա նշեց, որ «Գազպրոմ Արմենիա» ընկերությունը ներկայացրել է մի քանի պատճառ, որոնց թվում է Վրաստանի տարածքով գազի տարանցման սակագնի հնարավոր նվազումը, բիզնեսին և բնակչության սոցիալապես անապահով շերտերին տրամադրվող արտոնությունները, ինչը թույլ կտա ապահովել սպառման լրացուցիչ ծավալներ և կհանգեցնի ընկերության լրացուցիչ հասույթի:
ՀԾԿՀ նախագահի խոսքով, ընկերությունը նաև նշում է, որ իրականացրել է ֆինանսական պարտավորությունների հիմնական մասը, ինչի հաշվին լրացուցիչ ռեսուրսներ կազատվեն, ինչպես նաև օպտիմալացում կանցկացնի` արդյունքում ուղղելով տնտեսված գումարները այդ նպատակների իրականացմանը:
«Բացի այդ, ամենագլխավոր աղբյուրն այն է, որ ռուսական «Գազպրոմը» խոստացել է իր վրա վերցնել բոլոր ռիսկերը և պատրաստ է սուբսիդավորել անհրաժեշտ մասը, եթե ֆինանսական ռոսուրսները չբավականացնեն` բոլոր հնարավոր ռիսկերը բացառելու և սակագնի ցածր մակարդակը պահպանելու համար: Ընդ որում, սակագնի նվազումը չի ֆինանսավորվելու Հայաստանի պետական բյուջեից», - ընդգծեց Նազարյանը:
Այժմ 10 հազար խորանարդից պակաս գազ օգտագործող հայ բաժանորդների համար սակագինը կազմում է 146,7 հազար դրամ 1 հազար խորանարդի դիմաց, իսկ 10 հազար խորանարդից ավել օգտագործողների համար` 257,56 պայմանական միավոր 1 հազար խորանարդ գազի դիմաց: