Հայաստանում տնտեսվարողներին սկսել են տուգանել պոլիէթիլենային տոպրակների համար։ Այս մասին հայտնում են քաղաքապետարանի մամլո ծառայությունից։
Հունվարի 1-ից արգելվում է մինչև 50 միկրոն հաստությամբ պոլիէթիլենային տոպրակների օգտագործումը մանրածախ առևտրի օբյեկտներում, բացառությամբ կշռելու համար նախատեսված վերամշակված տոպրակների։ Տնտեսվարող սուբյեկտներին մոտ երկու տարի ժամանակ էր տրվել պոլիէթիլենային տոպրակներից հրաժարվելու և էկոլոգիապես անվտանգ լուծումներ գտնելու համար։
Հունվարի 20-ից Երևանի քաղաքապետարանի վարչական շրջանների աշխատակիցները ստուգումներ են անցկացնում, տուգանում խախտողներին։ Վերահսկողությունը կլինի ամենօրյա.
«Առևտրի և ծառայությունների մասին» օրենքում փոփոխություններն ուժի մեջ մտնելուց հետո մեր աշխատակիցները վերահսկողության նպատակով պարբերաբար այցելել են մանրածախ առևտրի կետեր, ձեռնարկությունների հետ բացատրական աշխատանքներ են տարել օրենքի պահպանման, թույլատրելի պայուսակների օգտագործման վերաբերյալ։ Այսօր արդեն սկսել ենք ստուգել, չափումները կատարվում են միկրոմետրերով։ Եթե տոպրակի հաստությունը 50 միկրոն հաստությունից պակաս է, ապա բիզնեսը պատասխանատվություն է կրում Վարչական իրավախախտումների մասին օրենքի համաձայն: Տուգանքի չափը կազմում է 20.000-30.000 դրամ»,- նշել է Երևանի քաղաքապետարանի առևտրի և սպասարկումների վարչության պետ Հովիկ Սաֆարյանը։
Նրա խոսքով, օրվա ընթացքում կազմվել է ավելի քան 60 արձանագրություն։
«Դեռևս թույլատրվում են բազմակի օգտագործման 50 և ավելի միկրոն հաստության տոպրակները, բայց, իհարկե, ժամանակի ընթացքում բիզնեսը ստիպված կլինի դիմել այլընտրանքային լուծումների»,- ասաց Սաֆարյանը։
Օրենսդրական փոփոխությունների հիմնական նպատակը բնապահպանական խնդիրների լուծումն է։ Շրջակա միջավայր նետված պլաստիկ տոպրակները բնության մեջ քայքայվում են ավելի քան 400 տարի։ Այս կերպ մասնագետները մտադիր են զգալիորեն նվազեցնել պոլիէթիլենի օգտագործումը։