Բավ է պառակտվել
20-01-2021 13:49

Հայաստանի նավթամթերքի շուկայում նոր «խաղացողներ» կհայտնվեն

Խորհրդարանը սկսել է ուսումնասիրել Հայաստանի և Ղազախստանի միջև «Նավթամթերքի մատակարարման ոլորտում առևտրատնտեսական համագործակցության մասին» համաձայնագրի վավերացման հարցը:
Խորհրդարանի հունվարի 20-ի նիստի ժամանակ ներկայացնելով փաստաթուղթը՝ տարածքային կառավարման և ենթակառուցվածքների փոխնախարար Վաչե Տերտերյանը տեղեկացրել է, որ համաձայնագիրը սահմանում է նավթամթերքների մատակարարման պայմանները։
Համաձայնագրի համաձայն՝ Ղազախստանից Հայաստան ապրանքների նշված խմբի մատակարարումները կիրականացվեն անվանացանկին և նախապես համաձայնեցված ծավալներին համապատասխան և չեն հարկվի մաքսային տուրքերով։
Փաստաթղթի շրջանակներում կողմերը մինչև յուրաքանչյուր տարվա դեկտեմբերի 1-ը կկազմեն և կհաստատեն հաջորդ տարվա ինդիկատիվ հաշվեկշիռը։ Համաձայնագրով արգելվում է Հայաստան մատակարարել հաստատված ծավալները գերազանցող ծավալներ, իր հերթին Հայաստանն իրավունք չունի երրորդ երկրներ վաճառել սահմանված պայմաններով մատակարարվող ղազախական արտադրանքը։
Պայմանագրի գործողության ժամկետը 2024 թվականի դեկտեմբերի 31-ն է, որին հաջորդում է ավտոմատ երկարաձգումը 5 տարով։ Համաձայնագիրը կնպաստի երկու երկրների միջև փոխշահավետ համագործակցությանը, առևտրատնտեսական կապերի զարգացման համար բարենպաստ պայմանների ստեղծմանը, գործարար ակտիվության բարձրացմանը:
Նա նշել է, որ նման պայմանագիր ներկայումս գործում է նաև Ռուսաստանի հետ։ Փոխնախարարը վստահ է, որ պայմանագրի վավերացումն ու իրականացումը կհանգեցնի բենզինի շուկայում մրցակցության աճին և, որպես հետևանք, գների անկմանը:

Արմինե Գևորգյան

Հայաստանում նշել են բենզինի և դիզվառելիքի գների փոփոխության պատճառները և չեն բացառել թանկացումները
Հայաստանը վավերացրել է Ղազախստանի հետ տեխնածին և բնական աղետների դեպքում աջակցության մասին համաձայնագիրը
Մեկ ամսվա ընթացքում Հայաստանում բենզինի գինը բարձրացել է 3.9 տոկոսով
Ցանկալի չէ մոտակա ընտրությունները Հայաստանում անցկացնել նոր ԸՕ-ով․ Վենետիկի հանձնաժողով և ԵԱՀԿ/ԺՀՄԻԳ
Հայաստանը նոր արտաքին քաղաքականություն է կերտում․ Փաշինյան