Հայաստանի վարչապետ Նիկոլ Փաշինյանը երկուշաբթի այցելել է Աշտարակում գտնվող ՀՀ ԳԱԱ Ֆիզիկական հետազոտությունների ինստիտուտ, որտեղ քննարկվել է Ակադեմիական քաղաքի կոնցեպտը։
Կառավարության մամլո ծառայությունը հայտնում է, որ Ակադեմիական քաղաքը նախատեսվում է տեղակայել ՀՀ ԳԱԱ Ֆիզիկական հետազոտությունների և Ռադիոֆիզիկայի և էլեկտրոնիկայի ինստիտուտների և դրանց հարակից այլ տարածքներում:
Ակադեմիական քաղաքում կտեղակայվի մինչև 8 բուհ՝ իրենց բոլոր ենթակառուցվածքներով: Արդեն իսկ մշակվել է Ակադեմիական քաղաքի նախնական հատակագիծը, որի համաձայն այնտեղ ստեղծվելու են ուսանողների և պրոֆեսորադասախոսական կազմի համար անհրաժեշտ բոլոր պայմանները: Բացի բուհերից, քաղաքում հիմնվելու են նաև բնակելի հատվածներ, հետազոտական կենտրոններ, մարզական ենթակառուցվածքներ, զբոսայգի, ամֆիթատրոն: Քաղաքը նախատեսված է լինելու մինչև 50 հազար մարդու համար:
Փաշինյանը կարևորել է գործողությունների ծրագրի մշակումը՝ հստակ ժամանակացույցով: Կառավարության ղեկավարն ընդգծել է քաղաքն անհրաժեշտ բոլոր ենթակառուցվածքներով ապահովելու կարևորությունը, այդ թվում՝ տրանսպորտային ցանցով: Վարչապետի խոսքով՝ Ակադեմիական քաղաքի հիմնումը կնպաստի նաև Արագածոտնի և հարակից մարզերի զարգացմանը, կրթական, հետազոտական կլաստերների ձևավորմանը: Նիկոլ Փաշինյանը նշել է, որ ծրագիրը կառավարության առաջնահերթությունների թվում է, և այն արդյունավետ կյանքի կոչելու համատեքստում պատասխանատու գերատեսչությունների ղեկավարներին տվել է մի շարք հանձնարարականներ:
Կառավարության ղեկավարին ուղեկցել են Վարչապետի աշխատակազմի ղեկավար Արայիկ Հարությունյանը, Կրթության, գիտության, մշակույթի և սպորտի նախարար Վահրամ Դումանյանը, Կադաստրի կոմիտեի ղեկավար Սուրեն Թովմասյանը և շահագրգիռ գերատեսչությունների այլ ներկայացուցիչներ:
Ակադեմիական քաղաք ստեղծելու գաղափարը
Սեպտեմբերի 1-ին կառավարության նիստում Փաշինյանը ներկայացրեց Աշտարակ քաղաքում Ակադեմիական քաղաք ստեղծելու ծրագրերը, ուր կտեղափոխվեն հանրապետության բոլոր պետական բուհերը։
Նրա խոսքով, կառավարությունը մտադիր է գնալ բուհերի ու գիտահետազոտական կենտրոնների համախմբման ու ինտեգրման ճանապարհով, հանրապետությունում կլինի առավելագույնը 8 պետական բուհ, որոնք կհամապատասխանեցվեն պետական չափանիշներին։
Անցած տարվա գարնանը Փաշինյանը խոսել էր «Հայաստանի բուհերի շենքերը վաճառքի հանելու գաղափարի մասին, որպեսզի հասույթով Երևանից դուրս ակադեմիական կամպուս կառուցվի»։ Այս կապակցությամբ մամուլում և սոցիալական ցանցերում դժգոհության ալիք բարձրացավ, որոշ օգտատերեր սկսեցին հրապարակել ֆոտոշոփում տարբեր օբյեկտների (սուպերմարկետներ, հյուրանոցներ) վերածված համալսարանական շենքերի լուսանկարներ:
Այն ժամանակ ՀՀ կրթության, գիտության, մշակույթի և սպորտի նախարար Վահրամ Դումանյանը, պատասխանելով լրագրողների հարցերին, հերքեց երկրի բուհերի մասնաշենքերը վաճառելու իշխանությունների որոշման մասին լուրերը։
Մեկնաբանելով Փաշինյանի ռեզոնանսային հայտարարությունը, նախարարն ասաց, որ եթե Ակադեմիական քաղաքի գաղափարն իրականանա, ապա շատ բուհերի մոտ «բնական ցանկություն կառաջանա տեղափոխվել այնտեղ, և այն համալսարանական շենքերը, որտեղ այլևս նպատակահարմար չի լինի ուսուցում անցկացնել, կարող են վաճառվել»։