ԱՄՆ-ի Օդագնացության և տիեզերական հետազոտությունների ազգային վարչությունը (NASA) երկուշաբթի իր կայքում ցուցադրել է Ջեյմս Ուեբ աստղադիտակի միջոցով գիտական նպատակներով արված առաջին լուսանկարը:
ԱՄՆ տիեզերական գործակալության հայտարարության մեջ ասվում է, որ դա «հեռավոր տիեզերքի մինչ օրս արված ամենախորը և հստակ ինֆրակարմիր պատկերն է»: Ինչպես նշել է NASA-ի ղեկավար Բիլ Նելսոնը, լուսանկարում պատկերված է «Տիեզերքի մի փոքր մասնիկ»։ «Մենք հետ ենք նայում ավելի քան 13 միլիարդ տարի առաջ»,- հավելել է նա։ «Լույսի արագությունը վայրկյանում 186,000 մղոն է (299,792,458 մ/վ), և այդ փոքրիկ կետերից մեկի լույսը, որը դուք տեսնում եք, ճամփորդում է ավելի քան 13 միլիարդ տարի»,- ասել է Նելսոնը Սպիտակ տանը:
Ինչպես վստահեցրել է տիեզերական բաժնի տնօրենը, աստղադիտակի օգնությամբ արված լուսանկարները հնարավորություն կտան տվյալներ ստանալ «մոլորակների մթնոլորտների քիմիական կազմի» մասին։ Նելսոնի խոսքով՝ այս տեղեկատվության հիման վրա փորձագետները կկարողանան եզրակացություններ անել, թե արդյոք այդ մոլորակները «հարմար են կյանքի համար»։
ԱՄՆ նախագահ Ջո Բայդենը աստղադիտակն անվանել է «նոր պատուհան դեպի մեր տիեզերքի պատմություն»։ Նրա խոսքով՝ հրապարակված լուսանկարը թույլ է տալիս տեսնել «լույսի առաջին առկայծումն այս պատուհանի միջով»։ ՆԱՍԱ-ն հայտնել է, որ երեքշաբթի օրը կներկայացնի Ջեյմս Ուեբի միջոցով արված «առաջին գունավոր պատկերների ամբողջական հավաքածուն»։
Աստղադիտակը ուղեծիր է արձակվել 2021 թվականի դեկտեմբերին՝ օգտագործելով Ariane 5 արձակող սարքը: Արձակումը տեղի է ունեցել Ֆրանսիական Գվիանայի Կուրու արձակման վայրից: Աստղադիտակը ՆԱՍԱ-ի, Եվրոպական տիեզերական գործակալության և Կանադայի տիեզերական գործակալության համատեղ նախագիծն է:
Աստղադիտարանում տեղադրված է 6,5 մ տրամագծով հայելի՝ երբևէ ուղեծիր դուրս բերված ամենամեծը: «Ջեյմս Ուեբի» օգնությամբ կուսումնասիրվեն տիեզերքի հնագույն աստղերն ու գալակտիկաները, որոնք առաջացել են Մեծ պայթյունից հետո, ինչպես նաև կփնտրեն պոտենցիալ բնակելի մոլորակներ։ Նրա շահագործման հաշվարկային ժամկետը 10 տարի է։