Այս տարի սեպտեմբերին Հայաստանում կայանալիք գիտության, արվեստի ու երաժշտության «STARMUS» VI միջազգային փառատոնի կազմակերպիչները պատմել են աստղաթափի գալիք ֆանտաստիկ գեղեցիկ երևույթի՝ Պերսեիդների ասուպային հոսքի՝ «աստղաթափի» մասին։
Ինչպես հաղորդվում է «STARMUS FESTIVAL VI. 50 տարի Մարսի վրա» ֆեյսբուքյան էջում, երկնքում ամեն տարի հուլիսի 17-ից օգոստոսի 24-ը կարելի է դիտել ասուպային հոսքը․ օգոստոսի 12-ի լույս 13-ի գիշերը «Պերսեիդների աստղաթափի» առավելագույն փուլն է։
Լուսային աղտոտվածությունից զուրկ անամպ վայրերում կարելի է տեսնել ժամում մինչև 100 «աստղի» անկում (իրականում ավազահատիկի չափ այս մասնիկները այրվում են մթնոլորտում և ոչ մի առնչություն չունեն աստղերի հետ):
Բյուրականի աստղադիտարանի տվյալներով՝ այս տարի Պերսեիդների աստղաթափի ինտենսիվության առավելագույն փուլը համընկնում է լիալուսնի հետ, ինչը կխանգարի հետևել այս երկնային երևույթին։