Հայաստանի առողջապահության նախարար Արսեն Թորոսյանը տեղեկացրել է, որ կորոնավիրուսի կանխման միջոցառումների շրջանակներում հատուկ հսկողություն պահանջող ուղղությունների շարքին (Չինաստան, Իրան, Իտալիա) ավելացվել են Ֆրանսիան, Գերմանիան և Իսպանիան։
“Հայաստանում մինչ օրս կատարվել է 203 հետազոտություն կորոնավիրուսի հայտնաբերման համար, որից դրական, ինչպես գիտեք, եղել է միայն մեկը։”, - գրել է Թորոսյանը Facebook- ի իր էջում:
Ըստ նրա, հետազոտվել են բոլոր անձինք, ովքեր ունեցել են համակցված բժշկական և համաճարակաբանական ցուցումներ։
Ավելի վաղ հաղորդվել էր, որ Հայաստանում COVID-19 առաջին և առայժմ միակ դեպքը գրանցվել է մարտի 1-ի գիշերը. փետրվար 28-ին կնոջ հետ Թեհրանից Երևան ժամանած 29-ամյա ՀՀ քաղաքացու կրկնակի թեստը ցույց է տվել դրական արդյունք: Ընդ որում, նրա կնոջ թեստը բացասական էր: Հիվանդ քաղաքացու հետ շփում ունեցած 31 անձ մեկուսացվել է Ծաղկաձորի հյուրանոցներից մեկում:
Իրավիճակն աշխարհում
ԱՀԿ կողմից COVID-19 անունը ստացած հիվանդության բռնկումն առաջին անգամ ի հայտ է եկել 2019 թվականի դեկտեմբերին Հուբեյ նահանգի 12 միլիոնանոց Ուհան քաղաքում (ՉԺՀ կենտրոն): Աշխարհի շուրջ 90 երկրում նոր կորոնավիրուսով արդեն վարակվել է ավելի քան 102 հազար մարդ, որոնցից ավելի քան 58 հազարն առողջացել է, իսկ 3491-ը ՝ մահացել:
Վարակվածների մեծամասնությունն՝ ավելի քան 80 հազար մարդ, բնակվում են Չինաստանում: Չինաստանի սահմաններից դուրս, ամենալուրջ համաճարակաբանական իրավիճակը նկատվում է Հարավային Կորեայում, Իտալիայում, Իրանում, Ճապոնիայում, Գերմանիայում, Ֆրանսիայում, Իսպանիայում և Միացյալ Նահանգներում: