Մարտի 25-ի, առավոտյան ժամը 10։00-ի դրությամբ Հայաստանում գրանցվել է կորոնավիրուսով վարակվածության 265 դեպք, տեղեկացվում է Հիվանդությունների վերահսկման և կանխարգելման ազգային կենտրոնի կայքում։
Կենտրոնի տվյալներով՝ մահացության դեպքեր չկան։ 1315 ընդհանուր թվով կորոնավիրուսի թեստավորման արդյունքները բացասական են։
Կորոնավիրուսի տարածման կանխարգելման նպատակով մարտի 16-ից ապրիլի 14-ը Հայաստանում սահմանված է արտակարգ դրության ռեժիմ։
Հայաստանում կորոնավիրուսի առաջին դեպքը գրանցվել է մարտի 1-ին, վարակված տղամարդն արդեն առողջացել է և դուրս գրվել հիվանդանոցից։
Արձանագրված է վարակի տարածման երեք օջախ․Իրանից ժամանած քաղաքացին, նշանադրությունն Էջմիածնում և Երևանի արտադրամասերից մեկը։
Վարակվածների թվում են Իրանից և Իտալիայից ժամանած Հայաստանի քաղաքացիներ (Երևանի, Էջմիածնի, Մեղրիի և Չարենցավանի բնակիչներ), նրանց հետ շփում ունեցած մարդիկ, ինչպես նաև Իտալիայի մեկ քաղաքացի և Ֆրանսիայից ժամանած այցելու։