Բավ է պառակտվել
21-01-2021 09:19

ԱՀԿ-ն ուսումնասիրում է COVID-19-ի դեմ 14 պատվաստանյութի, այդ թվում՝ երկու ռուսականի գրանցման հայտերը

Առողջապահության համաշխարհային կազմակերպությունը (ԱՀԿ) ուսումնասիրում է կորոնավիրուսի դեմ 14 պատվաստանյութ արտակարգ օգտագործման ցուցակում ներառելու համար ներկայացված հայտերն, որոնց թվում են երկու ռուսական դեղամիջոց՝ Ռուսաստանի առողջապահության նախարարության Ն.Ֆ. Գամալեի անվ․համաճարակաբանության և մանրէաբանության ազգային հետազոտական կենտրոնի մշակած «Սպուտնիկ V»-ն և Ռոսպոտրեբնադզորի «Վեկտոր» վիրուսոլոգիայի և կենսատեխնոլոգիայի պետական ​գիտական կենտրոնի ստեղծած «Էպիվակկորոնա»-ն։ Այս մասին ասված է ԱՀԿ մամլո ծառայության կողմից չորեքշաբթի օրը ՏԱՍՍ-ի թղթակցին տրամադրված «պատվաստանյութերի գնահատման կարգի կարգավիճակի մասին» փաստաթղթում:

Փաստաթղթից հետևում է, որ «Սպուտնիկ V» պատվաստանյութը անցել է հաստատման հինգ փուլերից երեքը: Մշակողների կողմից ԱՀԿ-ին տրամադրված լրացուցիչ տեղեկատվությունը գտնվում է ուսումնասիրության փուլում, և հունվարի 22-ին նախատեսված է հայտի «բովանդակության և ձևի քննարկումը»: Ինչ վերաբերում է «Էպիվակկորոն» պատվաստանյութին, ապա ըստ փաստաթղթի այն պետք է անցնի ևս չորս փուլ: Ռուսական պատվաստանյութերից ոչ մեկի համար ԱՀԿ փորձագետների կողմից վերջնական որոշման ամսաթիվը դեռևս որոշված չէ:

ԱՀԿ փաստաթղթում առաջին համարը Comirnaty պատվաստանյութն է, որը համատեղ մշակվել է ամերիկյան Pfizer և գերմանական BioNTech ընկերությունների կողմից: Այն անցել է բոլոր փուլերը և ԱՀԿ-ի կողմից հաստատվել 2020-ի վերջին օրը:

Մի շարք այլ պատվաստանյութերի համար որոշումներ կարող են կայացվել առաջիկա շաբաթների և ամիսների ընթացքում: Մասնավորապես, բրիտանա-շվեդական AstraZeneca ընկերության և Օքսֆորդի համալսարանի կողմից ներկայացված երկու դեղերից մեկի վերաբերյալ ԱՀԿ եզրակացությունը սպասվում «հունվարի վերջին - փետրվարին», իսկ երկրորդի վերաբերյալ՝ «փետրվարի երկրորդ կեսից ոչ շուտ»:

Նշված է, որ ամերիկյան ընկերության Moderna պատվաստանյութի վերաբերյալ որոշում կայացնելու հավանական ժամկետը փետրվարն է, իսկ Հնդկաստանի շիճուկի ինստիտուտի պատվաստանյութի վերաբերյալ եզրակացությունը կարող է հայտնվել փետրվարի կեսերին: Չինական Sinopharm և Sinovac ընկերությունների դեղերը կարող են կանաչ լույս ստանալ ԱՀԿ-ի կողմից մարտի սկզբին, իսկ չինական մեկ այլ՝ CanSino ընկերության կողմից մշակված դեղամիջոցի հնարավոր հաստատման ժամկետ ԱՀԿ փաստաթղթում նշված չէ։

Արտակարգ օգտագործման դեղերի ցանկ

Արտակարգ օգտագործման դեղերի ցանկում կորոնավիրուսի դեմ ռուսական պատվաստանյութերի ներառման հարցի քննարկումը տեղի կունենա սահմանված կարգով: Մասնավորապես, փորձագետները ուշադրություն կդարձնեն պատվաստանյութի արդյունավետությանն ու անվտանգությանն, ինչպես նաև դրա արտադրությանը, ասել է երեքշաբթի Ժնևում կայացած ճեպազրույցում ԱՀԿ խոսնակ Մարգարեթ Հարիսը:

Ըստ նրա, նման վերլուծությունն իրականացվում է ԱՀԿ-ում «շատ բծախնդրորեն»: Արտադրողները ստանում են հարցեր և պատասխանում դրանց: Անհրաժեշտ տեղեկատվությունը ստանալուց և դիտարկելուց հետո միայն ԱՀԿ մասնագետները կարող են որոշում կայացնել դեղանիջոցն արտակարգ օգտագործման համար առաջարկվող ցանկում ընդգրկելու մասին, նշել է կազմակերպության պաշտոնական ներկայացուցիչը: