Աբխազիայի նախագահ Ասլան Բժանիան, ով ուրբաթ օրը ստորագրել է ԴԺՀ-ի ու ԼԺՀ-ի անկախությունը ճանաչելու մասին հրամանագրերը, հանձնարարել է կառավարությանը նախապատրաստել բարեկամության և փոխօգնության միջպետական պայմանագրեր և դիվանագիտական հարաբերություններ հաստատել այդ հանրապետությունների հետ: Այս մասին ասվում է Բժանիայի՝ իր հայրենակիցներին ուղղված կոչում, որը հրապարակվել է նախագահի պաշտոնական կայքում։ Նախագահը ելույթ է ունեցել նաև պետական հեռուստատեսությամբ։ Այս մասին հայտնում է ՏԱՍՍ-ը։
«Հանձնարարում եմ Աբխազիայի Հանրապետության կառավարությանը նախապատրաստվել ճանաչված [Դոնեցկի և Լուգանսկի ժողովրդական] հանրապետությունների հետ բարեկամության, համագործակցության և փոխօգնության միջպետական համաձայնագրերի կնքման և նրանց հետ դիվանագիտական հարաբերությունների հաստատման գործընթացին»,- ասել է Բժանիան։
Փետրվարի 21-ին Ռուսաստանը ճանաչեց Դոնեցկի և Լուգանսկի Ժողովրդական Հանրապետությունների անկախությունը և փետրվարի 23-ի լույս 24-ի գիշերը հատուկ գործողություն սկսեց Դոնբասում բնակչության պաշտպանության համար։ Նրա հիմնական նպատակը «Ուկրաինայի ապառազմականացումն ու ապաազգայնացումն է», երկրի օկուպացիայի մասին խոսք չի գնում, ասել է ՌԴ նախագահ Վլադիմիր Պուտինը։