Միջազգային հանրությունն, այդ թվում՝ ԱՄՆ-ը և ՄԱԿ-ը, կարող են և պետք է հստակ միջոցներ ձեռնարկեն՝ կանխելու Արցախում հումանիտար ճգնաժամի հետագա խորացումը։ Այս մասին Twitter-ի իր միկրոբլոգում գրել է ԱՄՆ Կոնգրեսի Ներկայացուցիչների պալատի անդամ Ֆրենկ Փալոնը։
«Ես կոչ եմ անում Պետդեպարտամենտին օգտագործել բոլոր առկա դիվանագիտական գործիքները, ներառյալ պատժամիջոցները, այս շրջափակմանը վերջ տալու համար»,- գրել է Փալոնը։
Նա հիշեցրել է, որ շաբաթ օրը ադրբեջանական ուժերը բերման են ենթարկել արցախցի խաղաղ բնակչի, ով բուժման նպատակով տեղափոխվում էր Հայաստան։ Սա մարդու իրավունքների խախտում է, վտանգավոր նախադեպ է ստեղծվում՝ անհիմն պնդելով, որ նա հանցագործ է, քանի որ մասնակցել է Արցախյան առաջին պատերազմին։
«Դրանից հետո (Ադրբեջանի նախագահ Իլհամ-խմբ.) Ալիևը հասկացրեց, որ ինքը խաղաղություն չի ուզում, երբ չեղարկեց Արցախի ղեկավարության հետ ծրագրված բանակցությունները, որոնք պետք է կայանային այս շաբաթ Սլովակիայի մայրաքաղաք Բրատիսլավայում: Նրա գործողությունները նաև ցույց են տալիս, որ. նա շահագրգռված չէ Արցախում հայերի անվտանգության խնդիրները լուծելով»,- գրել է Փալոնը։
Նրա խոսքով, Ադրբեջանը շարունակում է արգելափակել Լաչինի միջանցքը՝ թույլ չտալով, որ սննդամթերքը, դեղորայքն ու էներգետիկ ռեսուրսները հասնեն արցախահայությանը։ Սա միջազգային իրավունքի խախտում է և Ալիևի ռեժիմի կողմից այդ մարդկանց դեմ ուղղված էթնիկ զտումների ակնհայտ արշավ։
