Ամերիկայի Հայ դատի հանձնախումբը (ANCA) կոչ է արել ԱՄՆ Կոնգրեսին դադարեցնել ռազմական օգնությունն Ադրբեջանին և ընդլայնել օժանդակությունն Արցախին և Հայաստանին։
ANCA-ի կառավարական գործերի գծով տնօրեն Թերեզա Երիմյանը շարադրել է հանձնաժողովի քաղաքականության առաջնահերթությունները վկայությունում, որն այսօր ներկայացվել է ԱՄՆ Ներկայացուցիչների պալատի՝ 2023 թ. արտաքին օգնության օրինագիծը մշակող հանձնաժողովին: Փաստաթղթում հատուկ շեշտադրվել է Ադրբեջանին ԱՄՆ-ի ողջ ռազմական օգնության ամբողջական դադարեցումը և Արցախին 50 միլիոն դոլարի հրատապ օգնության փաթեթի տրամադրումը։
Նա նշել է, որ Ադրբեջանի կողմից Արցախի (Լեռնային Ղարաբաղի) դեմ իրականացված էթնիկ զտումներից և Հայաստանի ինքնիշխան տարածքի մի մասի Բաքվի շարունակվող օկուպացիայի ֆոնին Կոնգրեսը պետք է պատասխանատվության ենթարկի Իլհամ Ալիևի ռեժիմին՝ դադարեցնելով ԱՄՆ-ի ամբողջ ռազմական օգնությունը այդ երկրի զինված ուժերին։
Երիմյանը նաև կոչ է անում երկարաժամկետ ներդրումներ կատարել Արցախի զարգացման գործում՝ օգնելու տեղի բնակիչների ընտանիքներին «վերակառուցել իրենց կյանքը և ապահով վերաբնակվել բնիկ հայկական հայրենիքում»։
Խոսելով Հայաստանին օժանդակության ավելացման անհրաժեշտության մասին՝ Երիմյանը որպես առաջնահերթություն մատնանշել է ԱՄՆ աջակցության ծրագրերը, որոնք ուղղված են Հայաստանի անվտանգության և ինքնիշխանության էական ամրապնդմանը Թուրքիայի և Ադրբեջանի կողմից սրվող սպառնալիքների պայմաններում։
Ինչպես նշել են ANCA-ում, նմանատիպ վկայություններ կներկայացվեն նաև ԱՄՆ Սենատին։
Ավելի վաղ հաղորդվել էր, որ Բայդենի վարչակազմի կողմից ներկայացված 2023 ֆինանսական տարվա պետական բյուջեի նախագծով առաջարկվում է նվազեցնել Հայաստանին տրամադրվող օգնությունը մինչև 24 միլիոն դոլար և հրաժարվել Լեռնային Ղարաբաղին օգնությունից։
Միաժամանակ, նախատեսվում է 2023 ֆինանսական տարում Ադրբեջանին տրամադրել 9,7 մլն դոլարի օգնություն (այս գումարը չի ներառում այն հատկացումները, որոնք Բաքուն ստանում է Պենտագոնից)։