Հայաստանի արտաքին գործերի նախարարի հրամանով Անի Բադալյանը նշանակվել է հանրապետության արտաքին գործերի նախարարության մամուլի քարտուղար, տեղեկանում ենք ՀՀ ԱԳՆ ֆեյսբուքյան էջից։
Երկուշաբթի ավելի վաղ Վահան Հունանյանը հայտարարել էր, որ ազատվել է ԱԳՆ մամուլի քարտուղարի պաշտոնից՝ անձնական դիմումի համաձայն։
Անի Բադալյանը ծնվել է 1991 թվականին Երևանում։ 2011 թվականին գերազանցությամբ ավարտել է Երևանի պետական համալսարանի միջազգային հարաբերությունների ֆակուլտետը, 2013 թվականին ստացել է մագիստրոսի աստիճան «Միջազգային հարաբերություններ, միջազգային իրավունք» որակավորմամբ, 2017 թվականին ավարտել է ԵՊՀ իրավագիտության ֆակուլտետի ասպիրանտուրան «Միջազգային իրավունք» մասնագիտությամբ։
2012 թվականից մինչև 2019 թ աշխատել է արտաքին գործերի նախարարության միջազգային պայմանագրերի և իրավունքի վարչության կցորդ, ապա՝ երրորդ քարտուղար, Եվրասիական տարածաշրջանի վարչության երրորդ քարտուղար։ 2019-2022 թվականներին նա զբաղեցրել է ԵՄ-ում Հայաստանի ներկայացուցչության երրորդ, ապա երկրորդ քարտուղարի պաշտոնները, իսկ 2023 թվականի հունվարից մարտը եղել է ՀՀ ԱԳՆ Եվրոպայի վարչության ԵՄ բաժնի պետի պաշտոնակատար։ Տիրապետում է անգլերենին, ռուսերենին, ֆրանսերենին: Ամուսնացած չէ։