Հայաստանը երբեք չի հրաժարվել ՀԱՊԿ դիտորդական առաքելությունն ընդունելուց, հինգշաբթի ասաց ԱԺ արտաքին հարաբերությունների մշտական հանձնաժողովի նախագահ, իշխող «Քաղաքացիական պայմանագիր» կուսակցության պատգամավոր Սարգիս Խանդանյանը։
«Ուղղակի այն փաստաթուղթը, որի հիման վրա պետք է առաքելությունը լիներ, շարունակվում է գտնվել լրամշակման փուլում։ Մեզ համար կարևոր է, որ կատարվեն այն արձանագրումները, որոնք պետք է օբյեկտիվորեն ներկայացնեն իրականությունը, թե ինչ է տեղի ունեցել ՀՀ ինքնիշխան տարածքի նկատմամբ»,- լրագրողներին ասաց պատգամավորը։
Խանդանյանի խոսքով, առանց ներկա իրավիճակի մանրամասն գնահատման, դժվար կլինի պատկերացնել այս առաքելության էությունը։
«Այնուամենայնիվ, Հայաստանը երբեք չի մերժել այդ առաքելությունը, Հայաստանը ցանկացել է, որ հստակորեն արձանագրվի խնդիրը»,- ասաց հանձնաժողովի նախագահը։
Նախօրեին ՌԴ արտաքին գործերի նախարարության պաշտոնական ներկայացուցիչ Մարիա Զախարովան հայտարարել էր, որ Հայաստանում ՀԱՊԿ առաքելության հնարավոր տեղակայման ժամկետները կախված են հայկական կողմից։