Հայաստանը գրավոր ծանուցել է ՌԴ-ին Ադրբեջանի հետ սահմանների դելիմատացիայի և դեմարկացիայի գործընթացը սկսելու համաձայնության մասին։ Այս մասին ուրբաթ օրը խորհրդարանում ճեպազրույցի ընթացքում ասաց Միջազգային հարաբերությունների հանձնաժողովի նախագահ, իշխող «Քաղաքացիական պայմանագիր» խմբակցության պատգամավոր Էդուարդ Աղաջանյանը։
Նոյեմբերի 18-ին ՀՀ վարչապետ Նիկոլ Փաշինյանը հայտարարեց, որ ՌԴ ՊՆ-ն հայ-ադրբեջանական սահմանի սահմանագծման և սահմանազատման նախապատրաստական փուլի հետ կապված առաջարկություններ է արել, որոնք ընդունելի են հայկական կողմի համար։
«Ռուսաստանը գրավոր ծանուցվել է մեր համաձայնության մասին։ Եվ այն պահին, երբ որոշ տեխնիկական հարցերի շուրջ պայմանավորվածություն ձեռք բերվի, Հայաստանը պատրաստ է սկսել հանձնաժողովի ձևավորման գործընթացը և անցնել անմիջական աշխատանքի»,- ասաց Աղաջանյանը՝ հավելելով, որ վարչապետը բազմիցս ասել է, որ Հայաստանը շահագրգռված է սկսելու. սահմանագծման և սահմանազատման գործընթացը և պատրաստ է դրան։
Պատասխանելով հարցին, թե արդյո՞ք Հայաստանը շարունակում է ռազմական օգնություն ակնկալել Ռուսաստանից սահմանագծման և սահմանազատման գործընթաց սկսելու առաջարկի ֆոնին, պատգամավորն ասաց, որ Հայաստանն օգնության համար դիմել է Ռուսաստանին՝ առաջին հերթին իր տարածքային ամբողջականությունը վերականգնելու համար։
«Հենց այս համատեքստում է պետք դիտարկել ռուսական առաջարկը, որը մենք քննարկում ենք։ Այդ գործընթացի արդյունքում ակնկալվում է, որ այս խնդիրը կլուծվի սահմանագծման և սահմանազատման արդյունքում, Հայաստանի տարածքային ամբողջականությունը կվերականգնվի այն գործընթացի ավարտից հետո, որը մենք քննարկում ենք»,- պարզաբանեց նա։
Նրա խոսքով, Ռուսաստանի ռազմական օգնությունը կամ ռազմական միջամտությունը ինքնանպատակ չէ. «Ամենակարևոր խնդիրն այժմ Հայաստանի ինքնիշխան տարածքի անձեռնմխելիության ապահովումն է, և սահմանագծումն ու սահմանազատումը այն գործիքներից են, որոնք կապահովեն նշված արդյունք»,- ընդգծեց նա։
Խոսելով այն մասին, թե արդյո՞ք Հայաստանին բավարարում է Ռուսաստանի արձագանքը սահմանագծման և սահմանազատման գործընթաց սկսելու առաջարկի ձևաչափով օգնության խնդրանքին, Աղաջանյանը նշեց, որ նման գնահատական հնարավոր կլինի տալ գործընթացի ավարտից հետո, երբ կլինեն կոնկրետ արդյունքներ. .
Իր հերթին, ԱԺ պաշտպանության և անվտանգության հանձնաժողովի նախագահ, իշխող «Քաղաքացիական պայմանագիր» խմբակցության պատգամավոր Անդրանիկ Քոչարյանը, պատասխանելով հարցին, թե այս դեպքում ինչո՞ւ է Հայաստանը դիմել Ռուսաստանի Դաշնության օգնությանը, բացատրեց, որ Հայաստանի և Ռուսաստանի միջև գոյություն ունի ռազմաքաղաքական պայմանագիր։
«Ռուսաստանը հրադադարի պահպանման երաշխավորն է, ինչի համար մենք պետք է միավորենք ուժերը։ Այդ իսկ պատճառով, անգամ չդիմելու դեպքում, այդ համագործակցությունը պետք է անհապաղ իրականություն դառնար»,- ասաց նա։
Քոչարյանը հավելեց, որ Հայաստանը Ռուսաստանին պայմաններ չի ներկայացնում, այլ ցանկանում է, որ համաձայնագրի բոլոր կետերը պահպանվեն։
«Մեր ինքնիշխան տարածքը ենթարկվեց ոտնձգության, դրա արդյունքում տեղի ունեցան ռազմական գործողություններ, և մեր բանակը թույլ չտվեց հակառակորդին տարածքային նոր ձեռքբերումներ ունենալ»,- ասաց նա։
Խոսելով հայ-ադրբեջանական սահմանին տիրող իրավիճակի մասին՝ նա նշեց, որ այժմ իրավիճակը կայուն է, բայց դա չի նշանակում, որ զգոնությունը կարելի է թուլացնել։
«Մենք պետք է համախմբենք ջանքերը, որպեսզի հակառակորդն իր գործողություններով ոչ մի կերպ չկարողանա ներքին լարվածություն առաջացնել։ Սա կհանգեցնի միայն մեկ բանի՝ մեր զինված ուժերում լրացուցիչ զոհերի»,- ասաց նա։