ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը ասում է, որ «Բանակն իր էությամբ կարող է ունենալ մեկ թշնամի՝ արտաքին: Բանակը երբեք ներքին խնդիրների մեջ չպետք է խառնվի: Բանակը պետք է իր ամբողջական էլիտար բնույթը վերականգնի»։
Նա շեշտեց, որ պետք չէ փնտրել էլիտար զորամասեր, քանի որ բանակը պետք է էլիտար լինի սպայակազմի, զինվորների հարաբերություններով, սպառազինությամբ ու ինտելեկտուալ կառավարման հնարավորություններով:
Անդրանիկ Քոչարյանը ասում է,որ բանակում ինքնասպանության դեպքերը բացառելու համար պետք է լուրջ աշխատանքներ տարվեն։ Բացթողումները, ըստ նրա, առնչվում են իրավական, հոգեբանական խնդիրների հետ: Պատգամավորը այս պահին ակտիվորեն շփվում է հոգեբանների հետ, ավելին` խնդրել են ներկայացնել 18 տարեկանների սթրեսոգեն վիճակը, երբ նրանք անցնում են ծառայության։
«Փետրվարը բանակի համար շատ ծանր ամիս էր: Ես անվանեցի, գուցե ոչ այնքան հաջող՝ սև փետրվար: Պետք է հասնել նրան, որ զինված ուժերում ինքնասպանության որևէ դեպք չլինի: Մեր զինված ուժերն այսօր մեր անվտանգության երաշխավորն են»:
Անդրադառնալով Արցախի Հանրապետության Պաշտպանության բանակի նոր հրամանատար նշանակմանը՝ Անդրանիկ Քոչարյանն ասաց, որ Ջալալ Հարությունյանի նշանակումը հրաշալի է համարում։
«Նշանակվել է մի մարդ, որն ունի բավականին խարիզմատիկ կերպար։ Այդպիսի խարիզմատիկ հրամանատարները շատ անհրաժեշտ են մեր բանակի համար, հիշեք՝ 90-ականներին մենք ունեցել ենք հենց այդպիսի խարիզմատիկ զինվորականներ, օրինակ՝ Մոնթե Մելքոնյանը, գեներալ Իվանյանը, բոլորն էլ լեգենդերար էին։ Այն ժամանակվա համար բոլոր հերոսները իրենց հերոսական կեցվածքը նվիրել են մեր հաղթանակներին»,-ընդգծեց Անդրանիկ Քոչարյանը։
«Ջալալ Հարությունյանը փոխարինեց Կարեն Աբրահամյանին, իսկ նա իր ինտելեկտուալ պոտենցիալով բավականին մեծ անելիքներ դեռ պետք է ունենա մեր ԶՈՒ-ի համար։ Իր կառավարման ժամանակ պարզապես նման դեպքեր եղան։ Ջալալը արժանի փոխարինող կլինի այս տրամաբանության՝ ԶՈՒ-ի ուժեղացման, փոփոխությունների, որն անհրաժեշտ է մեր երկրին՝ որպես ընդհանուր անվտանգային համակարգ»,- ասաց Անդրանիկ Քոչարյանը։
Նշենք, որ փետրվարի 24-ին Արցախի Հանրապետության նախագահ Բակո Սահակյանի ստորագրած հրամանագրով՝ գեներալ-մայոր Ջալալ Հարությունյանը նշանակվել է Արցախի Հանրապետության պաշտպանության նախարար – պաշտպանության բանակի հրամանատար։
Քոչարյանը խոսեց նաև բանակ զորակոչվող երիտասարդների մասին՝ հայտարարելով, թե պետք է հասնել նրան, որ եթե զորակոչվել է սահմանափակ առողջական խնդիրներ ունեցող երեխա (օրենքի սահմաններում), նա պետք է զորացրվի ավել առողջ, քան՝ զորակոչվել է. «Զորակոչվելուց հետո պետք է հոգատարությամբ առողջացնել զինվորին: Բանակից զորացրվողը պետք է լինի մեկ մակարդակ ավելի բարձր: Նախկինում ասում էին, որ բանակից տղամարդ են վերադառանում: Հիմա նաև որպես հպարտ քաղաքացի պետք է վերադառնալ»:
Արմինե Գևորգյան