Իշխող «Քաղաքացիական պայմանագիր» խմբակցության պատգամավորները երեքշաբթի օրը կայացած մամուլի ասուլիսում հայտարարեցին, որ հայ-ադրբեջանական սահմանը ղարաբաղյան հիմնախնդրի հետ կապ չունի։
«Հայ-ադրբեջանական սահմանը կապ չունի Ղարաբաղի հարցի հետ, սա տարածքային վեճ չէ։ Հայաստանը ճանաչում է Ադրբեջանի տարածքային ամբողջականությունը, բայց դա չի նշանակում, որ Լեռնային Ղարաբաղի բնակիչների ինքնորոշման իրավունքի հարցը փակված է»,- հայտարարել է պատգամավոր Մարիա Կարապետյանը։
Պատգամավոր Հռիփսիմե Գրիգորյանն իր հերթին նշել է, որ անհրաժեշտ է մեկընդմիշտ տարանջատել տարածքների հարցը ազգերի ինքնորոշման իրավունքից։ Օրակարգը, որ առաջ է քաշում Ադրբեջանը, հենց այս հարցը տարածքային վեճի վերածելու մասին է։
«Հայ-ադրբեջանական սահմանը, հիմնվելով Ալմա-Աթայի հռչակագրիի վրա, այն վարչական սահմաններն են, որոնք եղել են ԽՍՀՄ-ում։ Երբ մայիսի 12-ից հայտարարում ենք, որ Ադրբեջանը ներխուժել է Հայաստանի ինքնիշխան տարածք, խոսում ենք վարչական սահմանից մոտ 150 քառ. կմ խորությամբ գտնվող տարածքների մասին»,- ասել է իշխող «Քաղաքացիական պայմանագիր» խմբակցության պատգամավոր, արտաքին հարաբերությունների մշտական հանձնաժողովի նախագահ Էդուարդ Աղաջանյանը։
Նրա խոսքով, «Արցախի հարցի էությունը եղել է, կա և կլինի ժողովուրդների ինքնորոշման իրավունքի խնդիր, և մենք տարածքային վեճի ու բանավեճի չենք բռնվելու»։