«Նոր ժամանակներ» կուսակցության նախագահ Արամ Կարապետյանը մամուլի ասուլիսի ժամանակ հայտարարել է, որ նա կանխատեսում էր ԲՀԿ նախկին առաջնորդ Գագիկ Ծառուկյանի հեռանալը քաղաքականությունից: Խոսելով Հայաստանի ներքաղաքական իրավիճակից՝ Կարապետյանը հայտարարեց, որ ԲՀԿ առաջնորդ Գագիկ Ծառուկյանի հեռանալը քաղաքականությունից ճիշտ որոշում էր: Դեռ ավելին, Կարապետյանի խոսքով, նա վաղուց էր կանխատեսել Ծառուկյանի հեռանալը քաղաքական կյանքից և Հակոբ Հակոբյանին կալանավորելուց հետո մշտապես խորհուրդ էր տալիս հետևել նրան, թե ինչ տեղի կունենա Ծառուկյանի հետ: Նրա կարծիքով՝ նախագահ Սերժ Սարգսյանի և վարչապետ Հովիկ Աբրահամյանի գործունեությանը ուշադրություն դարձնելու ժամանակն է եկել, քանի որ շուտով հետաքրքիր պահ կհասունանա. բյուրոկրատիան կբախվի օլիգարխիացման հետ: Նա նաև անդրադարձ կատարեց Աշոտ Աղաբաբյանի և այլ ՀՀԿ ներկայացուցիչների նկատմամբ հարկային ստուգումներին և ասաց, որ հետզհետե պարզ է դառնում այն, որ հին օլիգարխները պետք է ամբողջությամբ հեռանան քաղաքականությունից: Խոսելով «100-ամյակը առանց ռեժիմի» շարժման մասին, որը ապրիլի 24-ից շուրջօրյա հանրահավաքներ կսկսի, նա հայտարարեց, թե կան բաներ, որոնց պատասխանները նա չունի: Քաղաքական գործչի խոսքով՝ կար ժամանակ, երբ նա չէր կարողանում առանց քմծիծաղի ընդունել «Ժառանգության» առաջնորդ Րաֆֆի Հովհաննիսյանի գործողությունների տրամաբանությունը: Ինչպես նշեց Կարապետյանը, Սեֆիլյանը ունի կոչեր, որոնց տրամաբանությունը նա նույնպես չի հասկանում: Նա նշեց, որ ոչ ոք դեմ չէ: Սակայն եթե փորձ կատարվի տարբեր լեզուներով թարգմանել «100-ամյակը առանց ռեժիմի» արտահայտությունը տպավորություն է ստեղծվում, որ այդ կոչը վերաբերվում է ցեղասպանությանը: