Բա՛վ է պառակտվել
01-05-2020 13:39

Հրաչյա Հակոբյանի հարց-հայտարարությունը գրվել է վարչապետի կողմից. Արսեն Բաբայան


Իրավապաշտպան Արսեն Բաբայանն այսօր ՀՀ գլխավոր դատախազությանը դիմում է ներկայացրել՝ պահանջելով իրավական գնահատական տալ ԱԺ պատգամավոր Հրաչյա Հակոբյանի հայտարարությանը։
Հիշեցնենք, որ «Իմ քայլի» պատգամավոր, վարչապետի աներորդի Հրաչյա Հակոբյանը ֆեյսբուքյան իր էջում մի շարք աղմկահարույց հարցադրումներ է արել Ազգային անվտանգության ծառայության (ԱԱԾ) նախկին տնօրեն Արթուր Վանեցյանին՝ նրա հրաժարականի պատճառների հետ կապված։
«Կարո՞ղ է մի օր պարզվել, որ Վանեցյանը ԱԱԾ տնօրենի պաշտոնից հեռացվել է օտարերկրյա հատուկ ծառայությունների կողմից հավաքագրված լինելու պատճառով: Կարո՞ղ է պարզվել, որ վարչապետ Նիկոլ Փաշինյանը փաստերի ճնշման ներքո նրան ստիպել է խոստովանել օտարերկրյա հատուկ ծառայությունների կողմից հավաքագրված լինելու փաստը», - գրել է Հրաչյա Հակոբյանը, ընդգծելով, թե համաշխարհային պրակտիկան ցույց է տալիս, որ օտարերկրյա գործակալներին բռնում և դատում են, երբ ուզում են հավաքագրող երկրի հետ հարաբերություն փչացնել: Իսկ եթե ոչ, գործակալին չեզոքացնում են, որ նա ուղղակի չկարողանա գործել: «Հայաստանը չի ուզում հարաբերություններ փչացնել ոչ մի երկրի հետ», - գրել է պատգամավորն՝ այդպես էլ չմանրամասնելով, թե որ երկրի մասին է խոսքը։

Արսեն Բաբայանն ասում է, որ վարչապետը տեսնում է իր ապաշնորհ կառավարության գործունեությունը, տեսնում է, որ իշխանությունը սկսել է փախնել իր տակից։ Նա իրական մրցակից Արթուր Վանեցյանի մեջ է տեսնում, և ընտանեկան ամբողջ ուժերը կենտրոնացրել են պարոն Վանեցյանի ուղղությամբ,;ՀՀ գլխավոր դատախազության դիմաց լրագրողների հետ զրույցում ասաց իրավապաշտպան Արսեն Բաբայանը։

Բաբայանը համոզված է,որ Հրաչյա Հակոբյանի հարց-հայտարարությունը գրվել է վարչապետի կողմից.
«Հրաչյա Հակոբյանը լինելով ԱԺ պատգամավոր՝ անում է մի անհեթեթ ու զրպարտչական հայտարարություն, բայց ինչ-որ հնարքի կիրառությամբ այդ հայտարարությունը ձեւակերպվում է այնպես, որ իր կարծիքով հնարավոր չլինի իրեն պատասխանատվության ենթարկել՝ զրպարտչության համար։ Այսինքն՝ քաղաքացիական դատավարության ընթացակարգով եւ դրա համար էլ ձեւակերպում է հարցեր։ Նպատակ ունենալով ցույց տալու, թե իբր այն հարցերը, որոնք ինքը ձեւակերպել է, դրանք իրականություն են։ Ինչու հենց Հրաչյա Հակոբյանը, որովհետեւ բոլորս գիտենք, որ ինքը վարչապետի ընտանիքի անդամ է եւ կարող է տպավորություն ստեղծվել հանրության մոտ՝ այ ընտանիքի անդամն է խոսում այսպիսի բաների մասին, ուրեմն ինքը տեղեկացված է։ Այդ հրապարակումը դեղին մամուլին հարիր հայտարարություն է։ Ամենադատապարտելին այն է, որ վարչապետի գրպանի պատգամավորներից մեկը, որն իրեն անկախ է հռչակել, հենց այդ գիծը տանում է առաջ»։
Իրավապաշտպանն ասաց, որ այդ հրապարակման վերաբերյալ պետք է գնահատականը լինի 3 ուղղություններով. «Պետք է լինի քաղաքական, իրավական եւ բարոյական, որովհետեւ սպայի արժանապատվությունն ու նվիրվածություն իր հայրենիքին՝ փորձել որեւէ կերպ կասկածի տակ դնել, այն էլ այնպիսի սպայի, որը եղել է ԱԱԾ տնօրեն։ Մի կողմից սուտ մատնության հարցն է, մյուս կողմից հանցագործության մասին իբր տեղեկություն ունենալու հարցն է, որովհետեւ եթե տեղի է ունեցել այդպիսի հանցագործություն, ապա պիտի տրվի գնահատական եւ ենթադրյալ հանցագործության պարտակումը»։

 

 

Արմինե Գևորգյան

Փաշինյանը հեղափոխության առաջնորդից վերածվեց իրեն սատարող ֆեյսբուքյան խմբակների վարչապետի
Արսեն Բաբայանը կալանավորվեց
Մենք հանդուրժում ենք համապետական ընտրությունների արդյունքները. Սամվել Բաբայանի հայտարարությունը
Հարուցված քրգործը քաղաքական բնույթ ունի․Արսեն Բաբայան
«Արսեն Բաբայանի դատավարությունը քաղաքական է»․պաշտպան Լուսինե Սահակյան