Հայաստանի ու Ադրբեջանի ՊՆ ղեկավարները ՌԴ պաշտպանության նախարար Սերգեյ Շոյգուի հետ հեռախոսազրույցներից հետո միջոցներ են ձեռնարկել սահմանին իրավիճակը կայունացնելու ուղղությամբ, Քիլիսալի լեռան շրջանում իրադրությունը կարգավորվել է։ Այս մասին հաղորդում է ՌԴ պաշտպանության նախարարությունը։
«Հայաստանի և Ադրբեջանի ՊՆ ղեկավարների հետ Ռուսաստանի Դաշնության պաշտպանության նախարար, բանակի գեներալ Սերգեյ Շոյգուի նախաձեռնությամբ կայացած հեռախոսային բանակցությունների արդյունքում ադրբեջանական և հայկական կողմերը միջոցներ են ձեռնարկել իրավիճակը կայունացնելու ուղղությամբ։ Այժմ Քիլիսալի լեռան շրջանում մարտական բախումները դադարեցված են, իրադրությունը կարգավորվել է և գտնվում է հսկողության տակ», - ասված է հաղորդագրության մեջ:
Ավելի վաղ հաղորդվել էր, որ ՌԴ ՊՆ ղեկավար Սերգեյ Շոյգուն Հայաստանի և Ադրբեջանի պաշտպանության նախարարների հետ հեռախոսազրույցներում կոչ էր արել դադարեցնել իրավիճակի սրմանն ուղղված գործողությունները։
Երեքշաբթի Հայաստանի պաշտպանության նախարարությունը հայտնեց, որ արևելյան ուղղությամբ ադրբեջանական զինուժի նախահարձակ գործողությունների արդյունքում հայկական կողմն ունի զոհեր և վիրավորներ, կորցրել է նաև երկու մարտական դիրք։ Հայաստանի Անվտանգության խորհրդի նախագահ Արմեն Գրիգորյանը հայտարարել է, որ հանրապետությունը դիմել է Ռուսաստանի Դաշնությանը «Հայաստանի տարածքային ամբողջականությունը պաշտպանելու» կոչով։ Մոսկվայում Հայաստանի դեսպան Վարդան Տողանյանը ՏԱՍՍ-ին ասել է, որ Ռուսաստանն ու Հայաստանը ռազմական և դիվանագիտական խողովակներով խորհրդակցություններ են անցկացնում հայ-ադրբեջանական սահմանին իրավիճակի սրման հետ կապված։