ԱՄՆ պետքարտուղար Էնթոնի Բլինկենը Ադրբեջանի նախագահ Իլհամ Ալիևի հետ երկուշաբթի օրն ունեցած հեռախոսազրույցում հորդորել է «անհապաղ» ապաշրջափակել Լաչինի միջանցքն՝ առևտրային ապրանքների շարժը վերականգնելու և հումանիտար ճգնաժամի ռիսկը նվազեցնելու համար։ Այս մասին ասված է Պետդեպարտամենտի պաշտոնական ներկայացուցիչ Նեդ Փրայսի հայտարարության մեջ։
«Այսօր Ադրբեջանի նախագահ Իլհամ Ալիևի հետ զրույցում պետքարտուղար Էնթոնի Բլինկենը կոչ է արել անհապաղ բացել Լաչինի միջանցքն առևտրային փոխադրումների համար՝ ընդգծելով, որ հումանիտար ճգնաժամի ռիսկը [կապված Լաչինի միջանցքի փակման հետ] խաթարում է Հայաստանի և Ադրբեջանի միջև խաղաղության հեռանկարները»,- ասվում է տեքստում։
Բլինկենը նաև հորդորել է Ալիևին կրկնապատկել ջանքերը Հայաստանի հետ երկկողմ խաղաղ բանակցություններում և մտահոգություն հայտնել Ադրբեջանում մարդու իրավունքների խնդրի առնչությամբ։