Բլինկեն. ԱՄՆ-ը պահանջում է անհապաղ ազատ արձակել բոլոր նրանց, ովքեր ապօրինաբար ձերբակալվել են Ադրբեջանում մարդու իրավունքների պաշտպանության համար

ԱՄՆ պետքարտուղար Անտոնի Բլինկենը կոչ է արել Ադրբեջանի իշխանություններին անհապաղ ազատ արձակել Ռուֆաթ Սաֆարովին, Սեւինջ Վագըֆգիզիին, Ազեր Գասիմլիին, Ֆարիդ Մեհրալիզադեին, Բախտիյար Հաջիևին, Գուբադ Իբադօղլուին, Meydan TV անկախ հեռուստաալիքի աշխատակիցներին և այլ ակտիվիստների, որոնք կալանավորվել են իրենց իրավապաշտպան գործունեության համար։

Բլինկենի հայտարարությունը ընդգծեց ԱՄՆ-ի մտահոգությունը Ադրբեջանում քաղաքացիական հասարակության և անկախ լրատվամիջոցների նկատմամբ ճնշումների աճի կապակցությամբ: Նա նշել է, որ Ռուֆաթ Սաֆարովը՝ Defense Line կազմակերպության համահիմնադիրը, որը փաստագրում է քաղաքական դրդապատճառներով ձերբակալություններ և կոռուպցիայի դեպքեր, կալանավորվել է դեկտեմբերի 3-ին՝ ԱՄՆ պետքարտուղարի Մարդու իրավունքների պաշտպանի մրցանակը ստանալուց օրեր առաջ։

Abzas Media-ի գլխավոր խմբագիր Սեւինջ Վագիֆգիզին հայտնի է կոռուպցիայի և պետական ​​միջոցների հափշտակության վերաբերյալ իր հետաքննություններով: Նրա աշխատանքը զայրացրել է իշխանություններին, և նա նախնական կալանքի տակ է 2023 թվականի նոյեմբերից։ Չնայած դրան, դեկտեմբերի 9-ին Վագիֆգիզին հեռակա կարգով ստացավ 2024 թվականի Հակակոռուպցիոն չեմպիոնների մրցանակը ԱՄՆ Պետդեպարտամենտի կողմից։

Բլինկենը կոչ է արել Ադրբեջանին դադարեցնել բռնաճնշումները քաղաքացիական հասարակության ակտիվիստների նկատմամբ, հարգել մարդու իրավունքները և հիմնարար ազատությունները և կատարել իր միջազգային պարտավորությունները, որոնք ստանձնել է ԵԱՀԿ-ին անդամակցելիս: