ԱՄՆ կոնգրեսի հարյուր անդամ ավելի քան քսան նահանգից կոչ են արել Բայդենի վարչակազմին կոնկրետ քայլեր ձեռնարկել Արցախի գոյատևման ու Հայաստանի անվտանգության ուղղությամբ, տեղեկացնում է Ամերիկայի հայ ազգային կոմիտեն (ANCA).
Պետքարտուղարին և պաշտպանության նախարարին հասցեագրված նամակում ընդգծվում է տարածաշրջանային ճգնաժամի լրջությունը, որն առաջացել է անցյալ աշնանը Արցախի դեմ Ադրբեջանի և Թուրքիայի ագրեսիայի հետևանքով, և առաջարկվում է շտապ միջոցներ ձեռնարկել հետևյալ ուղղություններով:
ԱՄՆ արտակարգ օգնություն, որը հնարավորություն կտա Արցախի ժողովրդին վերականգնել իրենց համայնքները և վերադառնալ բնականոն կյանքին՝ առանց հետագա արյունահեղությունից վախի;
ԱՄՆ-ի վերաներգրավում տարածաշրջանային կայուն կարգավորման որոնման մեջ, որը հիմնված է ինքնորոշման հիմնարար իրավունքի վրա՝ պաշտպանելով Արցախի անվտանգությունը և բացառելով նոր պատերազմի բռնկումը,
ԱՄՆ կողմից Արցախի ժողովրդի ինքնորոշման իրավունքի և հակամարտության կարգավորման գործում նրա՝ որպես օրինական բանակցողի ճանաչում,
Առանցքային դերակատարում հայ գերիների անհապաղ ազատ արձակումն ապահովելու գործում;
Թուրքիայի և Ադրբեջանի բարձրաստիճան պաշտոնյաների նկատմամբ պատժամիջոցների կիրառում, Բաքվին ԱՄՆ օգնության կասեցում և Ազատության աջակցման մասին օրենքի 907-րդ հոդվածի կասեցման դադարեցում;
ԱՄՆ աջակցություն Հայաստանի տնտեսական զարգացմանը և ադրբեջանական ագրեսիայի հետևանքով տեղահանված հայերին օգնության ցուցաբերում;
Նախագահ Բայդենի կողմից Հայոց ցեղասպանության ճանաչում: