Ոչ պաշտոնական այցով Միացյալ Թագավորություն գտնվող Հայաստանի նախագահ Արմեն Սարգսյանը երեքշաբթի հանդիպել է Միացյալ Թագավորության Եվրոպայի և Ամերիկայի նորանշանակ պետնախարար Քրիստոֆեր Պինչերի հետ:
Համաձայն ՀՀ նախագահի մամլո ծառայության, զրույցի ընթացքում Պինչերը շեշտել է, որ Հայաստանը իր երկրի համար արժեքավոր և կարևոր գործընկեր է:
Պետնախարարը ուրախությամբ նշել է, որ Սարգսյանն օտարերկրյա առաջին նախագահն է, ում հետ նա հանդիպել է նոր պաշտոն ստանձնելուց հետո:
Շնորհավորելով Պինչերին նշանակման կապակցությամբ ՝ Հայաստանի նախագահը վստահություն է հայտնել, որ այդ պաշտոնում նրա գործունեության ընթացքում Հայաստանի և Մեծ Բրիտանիայի միջև փոխգործակցությունը կխորանա և կամրապնդվի:
Զրուցակիցները ոչ պաշտոնական մթնոլորտում քննարկել են հայ-բրիտանական երկկողմ օրակարգը, տարածաշրջանային գործընթացների հետ կապված հարցեր: